Riba djaluna 13 di yanüari Kolegio Ehekutivo di Boneiru den su totalidat a sera konosí ku e minister di Hustisia i Siguridat, David van Weel. E siman akí e minister huntu ku su delegashon ta hasi un bishita di trabou na Boneiru. Su bishita ta den signo di sera konosí ku gobièrnu di nos isla i vários otro instansia, manera Ministerio Públiko, Kuerpo Polisial Hulanda Karibense (KPCN), Instituto Hudisial Hulanda Karibense (JICN) i e Sentro Regional di Informashon i Ekspertisio Hulanda Karibense (RIEC CN).
E seramentu di konosí ku e minister a brinda oportunidat na Kolegio Ehekutivo pa pone puntonan ku ta urgente riba agènda ora ta trata di nos legislashon i regulashon lokal. Asuntunan ku nan a papia tokante di dje ta entre otro e echo ku no tin un Lei pa Promoshon di Evaluashon di Integridat di parti di Atministrashon Públiko (Wet Bevordering Integriteitsbeoordelingen door het Openbaar Bestuur - Bibob) i tampoko un But Atministrativo ku ta parti di mantenshon di lei den Derecho Atministrativo. Esakinan ta leinan ku sigur ta nesesario pa por salbaguardiá bon gobernashon. Boneiru kada biaha ta bira mas atraktivo pa e asina yamá labamentu di plaka: ehekushon di transakshonnan finansiero ku e meta pa skonde e orígen ilegal di plaka òf di otro asuntunan. Esaki ta konsekuensia tambe di e kresementu di aktividatnan ekonómiko den e último añanan. I naturalmentu por usa e sektor inmóbil tambe bon pa esaki. Kombatimentu di práktika di labamentu di plaka ta algu ku e Kolegio Ehekutivo akí tin haltu riba agènda.
Tambe un biaha mas Kolegio Ehekutivo a ekspresá e deseo pa mas rápido posibel ratifiká e Tratado di Istanbul pa Boneiru, Saba i Sint Eustatius. E tratado akí ta pone eksigensia pa loke ta trata atendementu ku violensia (doméstiko) kontra hende muhé i mucha muhé i for di aña 2016 e ta vigente na Hulanda. Tantu e ministerio di Hustisia i Siguridat komo e ministerio di Salubridat Públiko, Bienestar i Deporte ainda mester tuma e akshonnan nesesario pa hasi posibel pa e tratado akí bira vigente akí tambe. A papia tambe tokante desaroyo di e Family Justice Center i un konbenio pa skol seif, kaminda kolaborashon ku Kuerpo Polisial Hulanda Karibense ta esensial.
Kolegio Ehekutivo a eksperensiá e kòmbersashon pa sera konosí komo positivo i tin e deseo pa kontinuá ku e kolaborashon.
