Kolegio Ehekutivo di entidat públiko Boneiru a pone un paso nobo pa mehorashon di maneho di kompanianan públiko. Ku lantamentu di un departamento spesial di Kompania di Gobièrnu, entidat públiko Boneiru ta skohe pa supervishon profeshonal riba e kompanianan den kua e ta enbolbí komo akshonista.
Ta trata di kompanianan ku ta aktivo den sektornan krusial manera energia, maneho di shushi, transporte i desaroyo ekonómiko. E kompanianan akí ta di gran importansia pa nos bida diario na Boneiru. Pa e motibu akí Kolegio Ehekutivo ke sa sigur ku nan ta funshoná bon, ku nan ta anda kuidadosamente ku sèn di komunidat i ku nan ta kontribuí na un servisio pagabel i konfiabel.
Servisio públiko fuerte ta rekerí un gobièrnu fuerte
‘Gobièrnu mester tuma su ròl komo doño na serio,’ segun diputado Clark Abraham, kende ta enkargá ku e kartera di Kompania di Gobièrnu. ‘Nos ke tin un bista den kon e kompanianan akí ta presta, kua ta e riesgonan ku tin, kiko nan ta aportá na nos komunidat i si nan ta logra nan metanan.’
Lantamentu di e departamento nobo ta ankra e responsabilidat akí den un forma sólido dentro di e organisashon públiko. Esaki ta nifiká: mihó maneho, mas supervishon i mas transparensia. E meta: un gobièrnu ku ta funshoná mihó pa nos hendenan di Boneiru.
Kiko esaki ta nifiká pa nos siudadanonan?
E Departamento di Kompania di Gobièrnu ta vigilá interes públiko, manera pagabilidat di koriente, kontinuidat di transporte, prosesamentu di shushi i stimulashon di empleo. E departamento ta desaroyá maneho, e ta tene supervishon i e ta raportá tokante esaki. Di e manera akí entidat públiko Boneiru por intervení mas trempan kaminda esaki ta nesesario i nan por duna mihó splikashon di e forma kon ta usa sèn di komunidat.
Di eksplorashon pa struktura fiho
Algun aña pasá ya kaba a nombra un ‘kwartiermaker’ pa eksplorá e tereno di kompania di gobièrnu. E fase akí a sòru pa konosementu balioso, pero no a kondusí ainda na un aserkamentu struktural. ‘Nos a siña ku pa bo ta un bon akshonista, esaki no por ta temporal. E mester ta un parti fiho di kon nos ta funshoná komo gobièrnu,’ segun diputado Abraham.
E departamento nobo ta ranka sali e aña akí ku un tim di konsehero di maneho, hurista i eksperto finansiero. E finansiamentu ta bini for di presupuesto di entidat públiko Boneiru i no ta bai a kosto di otro fasilidatnan sosial.
Traha huntu pa logra bon gobernashon
Ku e paso akí Kolegio Ehekutivo ta suprayá su kompromiso ku transparensia, gobernashon responsabel i un servisio públiko fuerte. Ta verwagt e promé raportahenan tokante e kompanianan di gobièrnu na aña 2026.
‘Nos ta hasi esaki pa Boneiru su hendenan,’ asina diputado Abraham ta konkluí. ‘Boso meresé fasilidatnan konfiabel, klaridat tokante kon ta gasta sèn di impuesto i un gobièrnu ku ta asumí su responsabilidat.’
