Kolegio Ehekutivo di Entidat Públiko Boneiru a tuma nota di e ekspreshonnan resien durante e konferensia di prensa ku e sekretario di estado di Relashonnan den Reino i Digitalisashon, señor Zsolt Szabó. Kolegio Ehekutivo ta kompletamente di akuerdo ku e yamada pa kita e enfoke for di solamente palabra i poné riba akshon konkreto pa por atendé na un manera efektivo ku e desafionan na Boneiru. Netamente pa e motibu akí Kolegio Ehekutivo ke aksentuá algun punto krusial ku tin influensia direkto riba progreso i forsa di ehekushon di nos isla.
Durante e konferensia di prensa a menshoná vários invershon importante, entre otro un suma di 24 mion euro destiná pa agrikultura i 16 mion euro pa mehorashon di kaminda. Kolegio Ehekutivo ta kompartí e urgensia i deseo pa atendé diligentemente ku e proyektonan akí na interes di pueblo di Boneiru. Sinembargo, te ku awe Entidat Públiko Boneiru no a haña ningun desishon ofisial ainda for di Reino pa e medionan primintí akí. Sin e aprobashon formal akí, pa Entidat Públiko Boneiru ta imposibel pa pone e sumanan akí riba presupuesto, pone nan riba merkado den forma di destaho i realmente hasi uso di nan pa proyektonan aspirá.
LEI DI REINO
Kolegio Ehekutivo ta mustra riba e echo ku e Lei di Finansa di e entidatnan públiko Boneiru, Sint Eustatius i Saba (FinBES), ku ta kai bou di responsabilidat di Ministerio di Asuntunan Interno i Relashonnan den Reino, ta pone kuadronan estrikto. E regulashon akí ta prohibí Entidat Públiko Boneiru pa hasi gastu òf asumí kualke obligashon sin un pòst riba presupuesto destiná pa esaki ku un desishon risibí ta kubri.
NO TIN AKSHON TA TUMANDO LUGÁ
Un ehèmpel klave di e manera ku prosesonan atministrativo i finansiero di parti di Reino ta influensiá e kapasidat lokal pa tuma akshon den un forma rápido i desisido, ta e kompensashon liber. Ta te den luna di sèptèmber i òktober di aña 2024 Entidat Públiko Boneiru a risibí e kartanan di Ministerio di Asuntunan Interno di mei i yüni 2024 tokante esaki. Esaki tabatin komo konsekuensia ku ta te den e aña presupuestario 2025 por a inkluí e medionan oumentá akí strukturalmente, loke Entidat Públiko Boneiru a hasi debidamente tambe.
Mas preokupantenan ainda ta sinembargo ku pa e aña aktual 2025 akí, te ku awe Entidat Públiko Boneiru no a risibí ningun pago di e kompensashon liber, ku konforme e presupuesto e tin derecho riba dje. Esaki ta pone un preshon konsiderabel riba e posishon di likides i e kapasidat di Entidat Públiko Boneiru pa ehekutá su tareanan i obligashonnan regular. E tipo di retrasonan akí den komunikashon, registrashon í pago formal ta difikultá un planifikashon i ehekushon na tempu seriamente.
Ku duele Kolegio Ehekutivo ta konstatá ku e palabranan i ambishonnan ekspresá for di Reino, no tur ora ta bai kompañá pa e aktonan atministrativo i finansiero ku ta nesesario pa realisá e ambishonnan akí riba nivel lokal. Esaki ta kondusí na retraso i frustrashon, i alabes ta mina e aspirashon pa yega na resultadonan rápido i visibel pa nos siudadanonan.
PALABRA TIN KU BIRA AKSHON
Pa e motibu akí Kolegio Ehekutivo di Boneiru ta hasi un yamada urgente riba Ministerio di Asuntunan Interno i Relashonnan den Reino pa tuma akshon i hasi loke nan ta bisa. Nos ta di akuerdo ku e nesesidat pa akshon i nos ta kla pa tuma nos responsabilidat. Sinembargo pa por hasi esaki, nos ta dependé di kolaborashon korekto i na tempu di Reino. Konkretamente nos ta pidi pa un pronto emishon di e desishonnan nesesario pa e fondonan pa agrikultura i nos kamindanan, í pago inmediato di e kompensashon liber pa aña 2025 ku ya kaba a keda primintí i presupuestá, di manera ku nos por realisá i kontinuá ku e proyektonan krusial akí i ku nos tareanan regular pa komunidat boneriano.
A bira tempu pa akshonnan konhunto i konkreto i pa ménos palabra, di manera ku huntu nos por traha pa logra un futuro próspero i sostenibel pa Boneiru.
