Kolegio Ehekutivo di Entidat Públiko Boneiru ke duna klaridat tokante e informenan rònt di kompra di un pida tereno na Santa Clara. Den medionan di komunikashon i riba plataformanan sosial nan a hasi pregunta tokante e ròl di diputado Clark Abraham relashoná ku e kompra akí.
Na tur momentu diputado Abraham a apstené di toma di desishon tokante e tópiko akí. Esaki ta nifiká ku e no a partisipá na e deliberashon i tampoko na e tumamentu di desishon tokante kompra di e tereno na Santa Clara.
Tur informashon ku (legalmente) por hasi públiko den e proseso ku ta andando akí, Kolegio Ehekutivo a hasi públiko.
E kompra akí ta den tratamentu ainda i pa e motibu akí Entidat Públiko Boneiru na e momentu akí no por kompartí informashon tokante e proseso di kompra. Asina ku a kompletá e proseso di kompra, Entidat Públiko Boneiru lo informá nos komunidat tokante esaki na un manera transparente.
Entidat Públiko Boneiru ta komprendé ku tin pregunta tokante e tópiko akí. Nos ta pidi nos komunidat pa komprenshon i konfiansa den e proseso ku ta andando. Transparensia i koutela ta bini na promé lugá den tur desishon ku Kolegio Ehekutivo tuma.
