E siman akí nos ta eksperensiá un kalor ekstremo na nos isla debí na un situashon inusual kaminda no tin bientu. Normalmente e bientu di pasat ta sòru pa freskura, pero ousensia di esaki ta hasi e temperaturanan aktual sumamente intenso. Pa e motibu akí ta importante pa nos ta bon prepará i pa tuma medida pa keda seif i kómodo.
Algun tep pa anda ku kalor:
- Keda hidratá: Bebe sufisiente awa, asta ora bo no tin set. Evitá alkohòl i kafeina, pa motibu ku esakinan por empeorá pèrdida di líkido.
- Evitá e oranan mas kayente di dia: Purba evitá esfuerso físiko entre 11:00 or i 16:00 or, ora ku solo ta kima mas fuerte. Buska freskura na sitionan ku hopi sombra òf den kas.
- Bisti paña liviano: Skohe paña di katuna koló kla ku ta laga airu pasa, ku ta tene bo kurpa fresku i ku ta apsorbé sodó.
- Tene bo kas fresku: Sera kòrtina i yalusí durante dia pa tene e kalor pafó. Hasi uso di fèn pa sirkulashon di airu, pero sòru pa bo no sinta ku e fèn dirigí direktamente riba bo.
- Paga tinu riba gruponan vulnerabel: Hende grandi, mucha i hende ku malesa króniko ta èkstra sensibel pa kalor. Sòru pa nan bebe sufisiente awa i no keda muchu hopi ora pafó.
- Buska freskura den awa: Landa den laman òf den pisina por yuda bo pa baha temperatura di bo kurpa. Evitá sinembargo ku bo ta keda muchu hopi ora den solo sin protekshon.
E kalor ekstremo akí por tin un impakto grandi riba bo salú i bo bida diario. Pa e motibu akí bo tin ku keda alerta i tuma e medidanan di prekoushon nesesario pa protehá bo mes i bo sernan kerí. Pa informashon adishonal i aktualisashon, semper bo por bishitá e wèpsait: www.bonairecrisis.com.