Dia 11 di aprel 2026 Boneiru huntu ku 12 otro Pais i Teritorio Ultramar a firma un Deklarashon Konhunto (Joint Declaration) durante e di 21 Foro di e Paisnan i Teritorionan Ultramar i Union Oropeo (OCT-EU Forum).
Den e Deklarashon Konhunto akí nan a stipulá e puntonan di salida pa e kolaborashon entre e Paisnan i Teritorionan Ultramar i Union Oropeo den e periodo di 2028-2034.
Durante e foro ku a tuma lugá for di 9 te ku 14 di aprel 2026 na nos isla bisiña Aruba, tabatin diferente kòmbersashon i konsulta entre e Paisnan i Teritorionan Ultramar, e nashonnan miembro di Union Oropeo i representantenan di Komishon Oropeo. Na nòmber di Boneiru gezaghèber John Soliano a partisipá na e kongreso ministerial, kaminda tur e 13 teritorionan ultramar ku ta forma parti di e Asosiashon di Paisnan i Teritorionan Ultramar (Overseas Countries and Territories Association – OCTA) a bini huntu pa firma e Deklarashon Konhunto.
Den e deklarashon a inkluí diferente punto di salida ku ta di importansia pa e Paisnan i Teritorionan Ultramar den e kolaborashon i negosashonnan ku Union Oropeo. Di e manera akí e Paisnan i Teritorionan Ultramar ta aksentuá ku nan tin di haber ku retonan konhunto i komparabel, pero na mes momentu nan ta pidi espasio tambe pa diferensiashon. Banda di esaki, den e deklarashon nan ta ekspresá nan apresio pa e oumento proponé di e presupuesto disponibel di Union Oropeo i nan ta suprayá e importansia di fleksibilidat den e prosesonan i e palabrashonnan di responsabilisashon den kaso di proyektonan ku Union Oropeo ta finansiá.
Mas aleu a menshoná diesun tema den e deklarashon konhunto, riba kua durante e periodo binidero lo pone énfasis na momentu di desaroyo i ehekushon di proyektonan ku ta bini na remarke pa finansiamentu. E temanan akí ta varia di resiliensia kontra klima i un ekonomia sostenibel, te transishon digital, konektividat marítimo, siguridat sosial i bon gobernashon.
Ku firmamentu di e Deklarashon Konhunto akí e partnernan a pone un paso importante den konsolidashon di e kolaborashon entre e Paisnan i Teritorionan Ultramar, e nashonnan miembro di Union Oropeo, i den realisashon di balor agregá pa tur partido enbolbí.
