Departamento di Salubridat Públiko, Primary Care Caribbean i Fundashon Mariadal ta invitá hendenan di 40 aña bai ariba pa dia 17 di mei 2024, e Dia Internashonal di Hipertenshon, laga midi nan preshon di sanger. Riba e dia akí hende di 40 aña bai ariba por laga midi nan preshon di sanger for di 08:00 or te 11:00 or na Fundashon Mariadal. Departamento di Salubridat Públiko ta kontentu ku Primary Care Caribbean i Fundashon Mariadal a hasi esaki posibel. Si siudadanonan vigilá nan preshon di sanger bon, esaki por redusí riesgo pa salú. Un preshon di sanger haltu por kondusí na problema serio, manera un ataka serebral, un ataka di kurason òf problema na nir.
Un hende ku un preshon di sanger haltu tin masha hopi preshon riba su adernan i su kurason. Hopi biaha hendenan no sa ku nan preshon di sanger ta muchu haltu. E motibu di esaki ta pasobra nan no tin keho ku ta indiká ku nan preshon di sanger ta muchu haltu. Pa e motibu akí nan ta deskribí un preshon di sanger haltu tambe komo un asesino silensioso (silent killer). Un preshon di sanger salú normalmente ta bou di 120/80. Ta importante pa preshon di sanger haltu haña tratamentu.
Tin diferente manera pa atendé ku preshon di sanger haltu. E konseho ta pa move mas, kome ménos salu i stòp ku humamentu. Un dòkter por preskribí remedi pa baha preshon di sanger. Ta posibel tambe pa na konsulta di dòkternan di kas haña tep di un eksperto ku ta sostené e konsulta, e ‘Praktijk Ondersteuner Huisarts – POH’.
E siman akí e sostenedónan di konsulta di dòkternan di kas ta bishitá empresanan i organisashonnan. E meta ta pa duna e personal informashon tokante preshon di sanger haltu i hasi nan konsiente di e riesgonan di esaki. Durante e bishitanan akí miembronan di personal di e empresanan i organisashonnan por a laga midi nan preshon di sanger tambe. Empleadonan di departamento di Salubridat Públiko tambe tabata presente na e okashon akí.
