For di 11 te 22 di sèptèmber 2023 nan ta hasi un investigashon na Boneiru tokante salú di hóbennan di 13 te ku 17 aña. Pan American Health Organization, PAHO, ta hasi e investigashon akí mundialmente. E meta ta pa den futuro mehorá yudansa pa hóben, hasiendo uso di informashon for di e investigashon. Pa e investigashon departamento di Salubridat Públiko ta traha estrechamente huntu ku PAHO.
Den e lista di pregunta nan ta hasi pregunta tokante entre otro kiko hóbennan ta kome i bebe. Tin pregunta tambe tokante higiena personal. I tin pregunta tokante tentamentu, cyber bullying i tokante droga, violensia, emoshon i seksualidat.
E investigashon ta tuma lugá na skol durante e oranan normal di lès. E skolnan ta koperá ku ehekushon di e investigashon. E hóbennan no ta obligá pa partisipá i nan no tin mester di skirbi nan nòmber ora di kontestá e preguntanan riba papel. Ora e kaba yena e lista di pregunta, e hóben mes por tira e lista den un kaha. Di e manera akí niun hende den e lokal no por mira kiko e hóben a yena.
Pa medio di karta i un foyeto a informá mayornan di hóbennan di 13 te ku 17 aña tokante e investigashon. Na skol e alumnonan a haña e informashon di nan mèntòr.
Bo ke sa mas tokante e investigashon? Yama òf app Anesty Piekeur di departamento di Salubridat Públiko riba 777 8614.
Teksto pa bou di portrèt
Algun tempu pasá departamento di Salubridat Públiko a hasi un investigashon di prueba. E tempu ei hóbennan di 18 aña a yena un lista di pregunta. Na final nan a konsehá ku e partisipantenan mes mester tira nan papel ku kontesta den un buzon. Di manera ku niun hende no por mira kiko nan a yena. PORTRÈT: Entidat Públiko Boneiru
