Na Boneiru for di 15 di novèmber 2021 te 28 di novèmber 2021 ta hasi investigashon di keho ku hendenan ta keda kuné durante hopi tempu despues ku nan tabatin COVID-19. E tipo di kehonan akí ta konosí tambe komo ‘long-COVID’. Departamento di Salubridat Públiko i Instituto di Reino pa Salubridat Públiko i Medio Ambiente (Rijks Instituut voor Volksgezondheid en Milieu – RIVM) ta hasi e investigashon na islanan BES. E meta ta pa investigá e kantidat di kaso di long-COVID i kua ta e siudadanonan ku ta kore mas riesgo pa haña e kehonan akí. Tambe e departamento ke haña sa kua ta e kuido ku suidadanonan ku tin e kehonan akí tin mester.
Partisipantenan na e investigashon ta haña pregunta tokante e kehonan ku nan tabatin durante hopi tempu despues di nan kontagio. Hendenan ku despues di nan kontagio no a keda ku keho i hendenan ku no tabatin corona tambe ta partisipá na e investigashon. Esaki ta nesesario pa hasi komparashon entre tur e hendenan akí. Departamento di Salubridat Públiko a skohe e partisipantenan pa partisipá na e investigashon. Huntu nan ta representá e grupo di pashènt na Boneiru.
For di 15 te ku 28 di novèmber 2021 empleadonan di departamento di Salubridat Públiko ta yama e posibel partisipantenan na e investigashon. Kada hende ta liber pa disidí si e ta partisipá na e investigashon. Ta hasi e investigashon via telefòn i e ta dura mas òf ménos 30 minüt. Si e momento ku e empleado di Salubridat Públiko yama no ta kumbiní e partisipante, ta traha un sita nobo pa yama.
Siudadanonan ku ke partisipá na e investigashon i den e periodo di 15 pa 28 di novèmber no a haña yamada, por partisipá tòg. For di 30 di novèmber nan por yama 0800 0800 i nan ta haña un lenk pa bai e lista ku pregunta. Departamento di Salubridat Públiko ta spera ku mas tantu hende posibel ta partisipá na e investigashon. Mas tantu hende partisipá, mas tantu informashon e departamento i RIVM ta haña tokante ‘long-COVID’ na Boneiru.
