Den luna di aprel 2026 ta kuminsá na Boneiru e proyekto spesial pa hóben Kibra i Konstruí: Un Biahe den mi Rais, parti di e Agènda di Akshon Pasado di Sklabitut Boneiru. E proyekto akí ta enfoká riba e konekshon entre pasado di sklabitut i e manera ku awendia ainda e tin impakto den famia, edukashon i salú mental di nos hóbennan. Entretantu inskripshon pa e protekto akí a habri. Hóbennan entre 15 i 21 aña por inskribí via nos wèpsait https://kibraikonstrui.my.canva.site/.
Entidat Públiko Boneiru, e departamentonan di SKAL (Sekshon di Kultura, Arte i Literatura) i GGD Boneiru / Salubridat Públiko, huntu ku Mental Health Caribbean (MHC) ta ehekutá e proyekto akí. E proyekto ta forma parti di e Agènda di Akshon Pasado di Sklabitut Boneiru i e ta kai den e programa di Fortifikashon di interkambio di patrimonio i kultura karibense. Intenshon di e programa akí ta pa mehorá salú mental di nos hóbennan i nan famia.
Te ainda historia tin influensia
E pasado di sklabitut di Boneiru te ainda tin influensia riba relashonnan den famia, edukashon i salú mental. Pensa por ehèmpel riba relashonnan difísil entre mayornan i nan yunan, troumanan ku ta pasa di generashon pa generashon i bèrgwensa pa buska yudansa. Pa un parti e temanan akí ta konsekuensia di historia di sklabitut. Ku e proyekto akí Entidat Públiko Boneiru i MHC ke kompartí konosementu na un manera aksesibel i kreativo tokante e influensia ku te ainda pasado di sklabitut tin. E inisiativa ta ofresé vários hèrmènt pa anda mas mihó ku e temanan akí i e ta stimulá kòmbersashon habrí den famia i den komunidat.
Tayer i biahe di inspirashon
Hóbennan di 15 pa 21 aña ta haña oportunidat pa partisipá na un trayekto inspirativo i edukativo ku tayernan interaktivo kaminda historia, reflekshon personal i arte ta bini huntu. Den un ambiente seif nan ta papia tokante temanan manera identidat, resiliensia i patronchinan den famia. E proyekto ta klousurá ku un eksposishon kaminda hóbennan ta kompartí nan eksperensianan i kreashonnan ku komunidat. Banda di esaki nan ta hasi un biahe di inspirashon pa Kòrsou, kaminda patrimonio, kultura i interkambio ta sentral. E eksperensianan ku e hóbennan optené durante e biahe akí, mester motivá nan pa aktivamente hasi esfuerso pa salú mental, arte, kultura i patrimonio.
Partisipashon na e proyekto
E proyekto akí a bira posibel tambe pa medio di nos partnernan Biblioteka Públiko Boneiru, FuHiKuBo, Glenn Helberg, Studio Pineda, Marz World, Ovier Maduro i Mangazina di Rei.
Hóbennan ku tin interes pa partisipá na e proyekto por registrá via https://kibraikonstrui.my.canva.site/. En total 30 hóben por partisipá. Dia 20 di mart 2026 tin un enkuentro di informashon pa hóbennan i mayornan ku ke haña mas informashon tokante e proyekto akí.
