Inskripshon pa e kompetensia literario “Arte di Palabra” a habri. Hóbennan ku kier partisipá por download e formulario for di e página di Facebook di Arte di Palabra. Por haña esaki tambe na SKAL. Por entregá esaki via di e-mail artedipalabraboneiru@hotmail.com òf na SKAL durante ora di kantor (8-12/14-16’or). E aña aki a habri un kategoria nobo p’asina hóbennan di grupo 8 por partisipá huntu ku hóbennan di skol avansá. Kompetensia di Arte di Palabra 2022 tin komo tema “Hubileo na den seku”. Esaki ta muzik toka akústiko.
Arte di Palabra ta un kompetensia di deklamashon na Papiamentu pa hóbennan den enseñansa avansá na Aruba, Boneiru i Kòrsou. Ta trata di un kompetensia anual i tin komo meta pa desaroyá talento literario hóben i literatura hubenil na Papiamentu pa medio di deklamashon di poesia i kontamentu di kuenta. Riba kada isla ta tuma lugá un kompetensia pa asina skohe e obranan ganadó pa bai kompetí ku hermana islanan. Den kuadro di esaki, Boneiru a ranka sali ku su kompetensia pa aña 2022.
Ounke ku e kompetensia interinsular ta pa hóbennan di skol avansá, tin petishon pa hóbennan di grupo 8 tambe partisipá. Komishon Arte di Palabra Boneiru a disidí di habri un kategoria nobo p’asina duna talentonan di grupo 8 tambe e oportunidat pa partisipá. Lo husga e obranan ku hóbennan di grupo 8 trese dilanti diferente fo’i esnan di skol avansá. Meta pa laga hóbennan di grupo 8 partisipá ta pa nan por entrená, prepará, sera konosí ku e Arte di Palabra i eksperensia kompetensia p’asina siguiente aña partisipá den e kategoria di hóbennan di skol avansá.
Desde awor hóbennan por inskribí nan mes pa partisipá na e kompetensia aki. Hóbennan por partisipá den diferente kategoria, por ehèmpel por partisipá den kategoria poesia original, poesia eksistente, kuenta original i òf kuenta eksistente. Pa partisipá mester yena e formulario ku ta disponibel na ofisina di SKAL i riba página di Facebook Arte di Palabra Boneiru.
Tema pa aña 2022 ta “Hubileo na den seku”. Den seku ta nifiká toka instrumènt no eléktriko. Tur aña ta skohe un tema riba tereno di kultura pa asina eduká partisipantenan riba e tema. E aña aki a skohe e tema “Hubileo na den seku” pa pone atenshon na e tradishon di tokamentu i reflehá riba e balor ku esaki tin pa kultura i historia di Boneiru. Tokamentu den seku tambe tin otro aspektonan interesante, por ehèmpel ku e ta un enkuentro kaminda diferente talento ta realisá un obra ku ta trese goso, memoria i harmonia serka tur ku ta disfrutá di e obra final.
Komishon Arte di Palabra lo hiba diferente aktividat di informashon pa por motivá hóbennan pa partisipá. Debí na e situashon di covid-19 na Boneiru, Komishon lo hiba un kampaña di promoshon adaptá. Pa informá i promové e kompetensia pa 2022, Komishon lo trata hasi esaki tambe pa medio di video.
