Den aña eskolar 2026-2027 bo yu por kuminsá den grupo 1 di skol básiko si entre 1 di mei 2026 i 30 di aprel 2027 bo yu ta hasi kuater aña.
Inskripshon mester tuma lugá na tempu
E fecha mas tardá pa por inskribí bo yu ta 1 di aprel 2026. Ta importante pa inskribí bo yu na tempu. E ora ei por pone bo yu na tempu na un skol básiko.
Inskribí online
Na un manera simpel bo por inskribí bo yu online via www.aanmeldenbasisonderwijsbonaire.com. Na momentu di inskripshon bo por indiká kua ta e skol básiko ku tin bo preferensia.
Ponementu na skol básiko
Despues di e fecha mas tardá di 1 di aprel 2026 ta pone e muchanan na un skol. E ponementu na skol ta a base di:
- E kantidat di inskripshon, i
- E kantidat di lugá disponibel na e skolnan.
No tin lugá na e skol di bo eskoho
Despues di inskripshon online di bo yu pa un skol básiko, por sosodé ku no tin lugá disponibel na e skol di bo preferensia. E skol ta informá mayornan na tempu tokante esaki.
Den e kaso akí nan ta supliká bo pa tuma kontakto ku e ámtenar di enseñansa obligatorio (leerplichtambtenaar) via leerplicht@bonairegov.com. A base di e sifranan Entidat Públiko Boneiru i ministerio di Enseñansa, Kultura i Siensia na Hulanda Karibense (OCW-CG) ta bai den kòmbersashon ku otro pa haña solushonnan ku ta kuadra.
No tur ora tin lugá mesora na skol
Na e momentu akí tin eskases di lugá pa haña enseñansa na Boneiru. Pa e motibu akí por sosodé ku no por pone bo yu mesora na un skol.
Entidat Públiko Boneiru, ministerio di Enseñansa, Kultura i Siensia na Hulanda Karibense (OCW-CG) i e direktivanan di skol ta tuma e situashon akí na serio i aktualmente nan ta trahando huntu pa haña solushon. Den esaki nan ta wak tantu solushon riba término kòrtiku komo solushon riba término largu. E meta ta pa mas rápido posibel haña un lugá pa haña enseñansa pa kada mucha.
Drenta skol den grupo 2 te ku 8
Pa mucha ku ta drenta skol den grupo 2 te ku 8 tin un otro prosedura na vigor. Pa esaki, tuma kontakto mesora ku e skol básiko pa informá tokante lugá disponibel i e prosedura di inskripshon.
Riba wèpsait di ministerio di Enseñansa, Kultura i Siensia na Hulanda Karibense bo ta haña un bista general di e skolnan básiko (enseñansa primario) na Boneiru i e informashonnan di kontakto: www.rijksdienstcn.com/onderwijs-cultuur-wetenschap/ouders-leerlingen/scholenoverzicht
Pregunta?
Pa pregunta bo por akudí na ocw@rijksdienstcn.com. A base di nan responsabilidat konhunto, ministerio di Enseñansa, Kultura i Siensia na Hulanda Karibense (OCW-CG) i Entidat Públiko Boneiru ta kontestá bo preguntanan.
