Resientemente Direktorado di Planifikashon i Desaroyo a kuminsá ku un trayekto pa revisá i optimalisá maneho i mantenshon di áreanan ku vegetashon, pa medio di desaroyo di un plan di maneho pa vegetashon públiko. Esaki ta un paso krusial ku ta surgi for di e proseso akí.
Pa medio di presensia di un kantidat konsiderabel di vegetashon ku ta stroba aksesibilidat i siguridat den espasio públiko, a inisiá un trayekto riba eskala grandi pa rekobrá retraso riba tereno di vegetashon. E proseso pa rekobrá retraso akí ta un parti integral di e Plan di Maneho Vegetashon Públiko Boneiru.
E proseso pa rekobrá retraso akí ta sirbi tambe komo un proyekto piloto pa un aserkamentu nobo di dunamentu di tarea i monitoreo di kalidat. Den esaki e kolaborashon entre stakeholdernan lokal ta esensial i ambishon di Entidat Públiko Boneiru ta pa yena esaki kualitativamente. Ku esaki Entidat Públiko Boneiru su aspirashon ta pa optené un bista general profundo di tur aspekto ku ta di importansia pa por bai hasi akshonnan i palabrashonnan konkreto.
Den kuadro di e proseso di rekobrá retraso akí, na kuminsamentu di luna di aprel a organisá diferente enkuentro di informashon ku empresanan ku ta okupá nan mes ku mantenshon di vegetashon. Durante e enkuentronan akí a duna splikashon di e proseso nobo pa dunamentu di tarea i a deliberá tokante e plannan pa e futuro atendementu ku áreanan di vegetashon. Akí e énfasis tabata riba uso di un plan di maneho komo manual pa mantenshon di vegetashon. Tambe a duna informashon tokante e plannan pa mantenshon struktural, repartishon di e áreanan di trabou i importansia di engrandesimentu di enbolbimentu di habitantenan ku tenementu di Boneiru limpi. Entidat Públiko Boneiru ta satisfecho tokante e enbolbimentu aktivo i e kolaborashon konstruktivo durante e enkuentronan akí.
A base di e proseso di rekobrá retraso akí ta determiná akshonnan konkreto pa realisá e vishon relashoná ku maneho di vegetashon, pa garantisá kontinuidat i pa realisá e kalidat rekerí. E trayekto akí no ta primintí solamente un mehorashon di e áreanan ku vegetashon, pero tambe desaroyo di un maneho sostenibel i ku enfoke riba e metanan stipulá pa término largu.
