Ku inisio ofisial di e programa di kapasitashon ‘Good Governance’, Entidat Públiko Boneiru ta marka un logro den su aspirashon pa yega na bon gobernashon. Gezaghèber interino Oleana, kende e mes tambe ta partisipante na e kapasitashon, a hasi apertura di e seshon di ‘kick off’. Akí el a enfatisá ku e kapasitashon akí ta siña bo konosementu i abilidatnan ku ta nesesario pa funshon di supervisor den un Hunta di Komisario di un kompania òf fundashon di gobièrnu.
Entidat Públiko Boneiru konosé 14 kompania anónimo i fundashon di gobièrnu. Kompanianan i fundashonnan konosí di gobièrnu ta entre otro BIA, WEB i Fundashon Wega di Number. E kompanianan i fundashonnan akí ta sòru pa provishonnan nesesario na Boneiru. Pa un maneho efektivo nan ta keda na un distansia apropiá for di gobièrnu. E Hunta di Komisario di e kompania òf fundashon tin e obligashon pa tene supervishon riba funshonamentu di e kompania òf fundashon di gobièrnu. Esaki hopi biaha nan ta indiká komo ‘Good Corporate Governance’.
Un funshon den un Hunta di Komisario pues ta un tarea responsabel i ta eksigí sierto konosementu pa loke ta trata kontenido i tambe ‘knowhow’ lokal. Residentenan di Boneiru ta disponé di e ‘knowhow’ lokal, solamente no tur ora e konosementu di kontenido di e trabou di supervishon i pa e motibu akí tin ora nan ta pèrdè e chèns pa bira supervisor. Ku e kapasitashon akí Entidat Públiko Boneiru ta ofresé residentenan di Boneiru e posibilidat pa atkerí e konosementu akí. Na final di e kapasitashon e kursistanan a risibí formashon riba tur e partinan i nan ta disponé di e kualifikashonnan pa un funshon den un Hunta di Komisario di un kompania òf fundashon di gobièrnu.
Durante e kapasitashon e kursistanan ta haña preparashon pa un ròl komo komisario. Por ehèmpel e parti finansiero i ekonómiko di e komisariado ta keda tratá ampliamente. Ta duna atenshon tambe na e dilemanan ku nan ta topa i kon nan por aktua den un forma independiente i íntegro relashoná ku esakinan. E kapasitashon ta kombiná konosementu teóriko ku ehersisionan práktiko ku ekspertonan regular i ekspertonan di eksperensia.
E kapasitashon ta pa residentenan di Boneiru ku minimalmente un formashon na nivel di HBO òf ekivalente i dominio di papiamentu ta un eksigensia. Entidat Públiko Boneiru i Ministerio di Asuntunan Interno i Relashonnan den Reino ta kubri e parti mas grandi di e gastunan di e kapasitashon. Ta pidi e partisipantenan un kontribushon propio di $ 250. E Ofisina di Kompanianan i Fundashonnan (Bureau Deelnemingen) di Entidat Públiko Boneiru ta fasilitá e kapasitashon ‘Good Governance’.
