E kampaña Bario Limpi a terminá eksitosamente. Durante tres wikènt di akshon den e promé tres simannan di desèmber a kolektá en total 132 tòn di sushi den diferente bario na Boneiru. E último rònt di akshon a tuma lugá for di 19 te ku 21 di desèmber, kaminda a kolektá otro 38 tòn di sushi.
Bario Limpi tabata un inisiativa di Direktorado di Supervishon i Mantenshon di Lei di Entidat Públiko Boneiru i Selibon NV. Ku satisfakshon ámbos organisashon ta wak bèk riba e kampaña. Hopi habitante a hasi uso di e bakinan di sushi temporal ku nan a pone na diferente sitio den e barionan. Danki na e kompromiso konhunto akí vários bario visibelmente a bira mas limpi.
Despues ku e kampaña a finalisá, Selibon NV a limpia tur sitio kaminda tabatin baki di sushi kompletamente, di manera ku a laga espasio públiko nèchi atras.
E kantidat di sushi kolektá pa kada bario ta komo lo siguiente:
- Amboina: 18,8 tòn
- Antriol Pariba: 7,6 tòn
- Antriol Pabou: 8,1 tòn
- Belnem: 6,6 tòn
- Hato: 2,6 tòn
- Playa: 2,4 tòn
- Nikiboko Nort: 12 tòn
- Nikiboko Sùit: 15,4 tòn
- Nort’i Saliña: 8,2 tòn
- Rincon: 8,6 tòn
- Tera Kòrá: 23 tòn
- Tra’i Montaña: 8,5 tòn
Durante e kampaña e bario Nikiboko a kolektá en total 27,4 tòn di sushi (Nort i Sùit huntu) i ku esaki a resultá di ta e bario ku a presta mihó den e kampaña.
‘Nos ta hopi orguyoso di dedikashon di nos hendenan den e barionan,’ segun Sherman Blanken, hefe di departamento di Proyekto di Mantenshon di Lei i Taskforce. ‘E kampaña akí ta mustra ku huntu berdaderamente nos por hasi e diferensia. Sigur nos ta bai wak si nos por organisá Bario Limpi mas biaha den futuro.’
A bini ku e kampaña Bario Limpi pa sostené nos habitantenan na momentu di deshasí di sushi i pa krea konsientisashon tokante importansia di un ambiente di biba salú. E resultado ta mustra ku enbolbimentu di nos hendenan ta grandi i ku hopi habitante aktivamente ke hasi esfuerso pa un Boneiru mas limpi.
