Hopi ánimo pa treinen tokante EU Budget Support

E Support ta un forma di asistensia ku ta pone fondo disponibel ku ta keda transferí direktamente pa presupuesto di OLB komo un kontribushon na realisashon di metanan di maneho.

Komo parti di asistensia tékniko pa asistí Entidat Públiko Boneiru ku ehekushon di e  programa di EU Budget Support (sosten presupuestario di Union Oropeo) pa maneho di hubentut, den e siman di 27 di febrüari pa 3 di mart 2023 dos tayer/treinen a tuma lugá. Gezaghèber Edison Rijna komo Territorial Authorized Officer di Boneiru pa Union Oropeo a habri e promé dia di treinen i a deseá tur hende hopi éksito i plaser.

EU Budget Support ta un forma di asistensia kaminda ta pone fondo disponibel ku ta keda transferí direktamente pa presupuesto di gobièrnu komo un kontribushon na realisashon di metanan di maneho. E gobièrnu ku ta risibí e sosten mes ta formulá e metanan akí, bou di kondishon ku e pais ku ta risibí e sosten ta realisá sufisiente progreso den ehekushon di e maneho en kestion.

E promé programa di EU Budget Support pa Boneiru ta relashoná ku sosten pa maneho di hubentut i ta un suma di en total 3,6 mion euro, di kua a risibí 2,2 mion euro na aña 2020. Lo risibí e sobrá 1,4 mion euro na fin di aña 2023, basta ku Boneiru realisá sufisiente progreso ku implementashon di e maneho di hubentut. E di dos programa di Budget Support pa Boneiru ta den preparashon i esaki ta relashoná ku maneho riba tereno di purifikashon di awa shushi.

Kolaborashon ekilibrá

Kristina Sevastou, representante di e delegashon di Union Oropeo ku responsabilidat pa Boneiru a bisa tokante esaki: ‘Boneiru i Union Oropeo konosé un relashon largu ku otro. Budget Support ta hasi e sosten di Union Oropeo parti di e presupuesto di Boneiru, i ku esaki parti di Boneiru su propio kapasidat di ehekushon i kontròlnan demokrátiko. Esaki ta un señal di un kolaborashon i ‘partnership’ ekilibrá.’

Durante e treinennan a introdusí tambe e portal nobo di internèt ku informashon tokante tur fondo i ayudo di Union Oropeo ku ta disponibel, pa kua Boneiru por bini na remarke. Esaki ta aksesibel via: https://bonairegov.com/idb. Boneiru ta e promé den region ku tin un punto di informashon sentral ku ta aksesibel pa suidadanonan, empresarionan i gobièrnunan.