Direktorado di Komunidat i Kuido ta traha riba profeshonalisashon di ‘coaching i guia di hende ku limitashon mental leve. Komo parti di e programa mas amplio “Trahando riba Prosperidat i Bienestar di Boneiru” i e proyekto piloto “Guia spesialisá pa hende ku limitashon mental leve”, Direktorado di Komunidat i Kuido for di 10 te ku 15 di febrüari 2025 a organisá un siman di kapasitashon intensivo na Captain Don’s Habitat. Durante e siman, partisipantenan, lifecoach-nan i guianan a traha riba nan desaroyo personal i a risibí formashon spesialisá pa por duna un mihó kalidat di guia na nos komunidat.
E proyekto piloto ta enfoká riba fortifikashon di hende ku un limitashon mental (leve), inkluso hende ku ta surdu i otronan ku ta funshoná riba e nivel akí. E meta ta pa engrandese nan outosufisiensia i promové nan partisipashon aktivo den nos komunidat.
Ekspertonan di di Mee de Meent Groep for di Hulanda a guia e siman di kapasitashon. Representantenan di organisashonnan lokal, lifecoach-nan i guianan preventivo a risibí vários treinen i tayer. En total 20 partisipante a sigui diferente kapasitashon i nan a risibí un sertifikado. Entre otro Hyrickscoaching, Akseso, FKPD, Forma, Zorg en Welzijngroep, Plenchi di Trabou, TolkQ i entidat públiko Boneiru a profundisá nan mes den diferente metodologia i ehersisio práktiko. Ta trata di e siguiente kapasitashonnan:
- Konosementu di Limitashon Mental Leve (LVB) i kapasitashon den Fortifikashon di Ret Sosial: Profundisashon a base di kontenido den guia di i kòmbersashon ku hende ku un limitashon mental (leve).
- Hèrmènt práktiko i tayer: Pensa riba simulashon di Realidat Virtual (VR), uso di pintura (“Bo ta pinta huntu ku mi?”).
- Intervishon: Pa medio di regularmente duna fitbèk i kompartí konosementu ku otro, ta tradusí e konosementu optené mesora den práktika.
E partisipantenan na e proyekto piloto i nan famianan a ripará progreso, loke ta konfirmá ku e aserkamentu akí ta funshoná. E siman a finalisá ku un evaluashon konhunto, kaminda e partisipantenan a kompartí nan eksperensianan i a hasi palabrashon pa implementashon di e métodonan ku nan a siña den nan trabou diario. Esaki ta krea un base sólido pa un futuro mas fuerte di guia spesialisá na Boneiru i nos komunidat.
