Pa basta tempu kaba molèster di kachó ku ta kana lòs i e kantidat di insidente ku mordementu ta forma un problema grandi. Aunke ku den e ordenansa di kachó a inkluí ku e doño di kachó tin e obligashon pa tene un kachó den su propio kurá, den práktika regularmente ta resultá ku esaki ta otro. Un ordenansa so no ta sufisiente i e problemátika rònt di komportashon di kachó ku ta kana lòs ta hopi mas kompliká i pa e motibu akí esaki ta pidi pa un aserkamentu integral amplio.
Komo guia lo usa e Plan di Aserkamentu Bienestar di Bestia 2021 – 2025. A realisá e plan akí despues di konsulta ku e organisashonnan di yudansa pa bestia ku ta presente na nos isla, e dòkternan di bestia i e entrenadó di kachó. E promé komienso t’ei, awor mester konbertí maneho den ehekushon. Pa e motibu akí riba inisiativa di Entidat Públiko Boneiru a krea un grupo di trabou den kua empleadonan di Supervishon i Mantenshon di Lei, Ofisina di diputado Thielman, Gabinete di Gezaghèber, Kuerpo Polisial Hulanda Karibense, Ministerio Públiko i departamento di komunikashon ta partisipá. E grupo di trabou tin komo tarea pa konbertí e Plan di Aserkamentu den un agènda di ehekushon, kaminda entre otro e siguiente puntonan pa para sentral:
- responsabilidat di doño di kachó i seramentu di kurá;
- kuido i edukashon;
- sterilisashon i registrashon.
Kaminda ta posibel lo hasi uso di inisiativanan eksistente, manera sterilisashon grátis i lo enbolbí organisashonnan di yudansa pa kachó pa skucha i duna reakshon komo eksperto riba kontenido. E insidentenan ku mordementu ta grave. Mantenshon di lei pa loke ta trata kachó ku ta kana lòs i e posibilidat pa duna but ta bai forma parti di e aserkamentu integral. Sinembargo mester hasi mas ku solamente kumpli ku e yamada pa mantenshon di lei. Kuido i edukashon ta hunga un ròl grandi den komportashon di kachó i e responsabilidat pa esaki ta keda serka e doño di kachó. E manera ku e doñonan di kachó ta anda ku nan kachónan tambe ta hopi diferente.
E grupo di trabou ta bai enfoká prinsipalmente riba konbertí maneho den ehekushon den un forma mas fleksibel posibel. Banda di esei nan ta bai okupá nan mes tambe ku dunamentu di informashon. E kampaña di informashon kaminda kuido den sentido mas amplio di e palabra lo ta sentral, ta haña sosten di e maskota Wufi i e ekspreshon: ‘Bo kachó, bo responsabilidat’. Wufi a keda inspirá pa un kachó maltratá, ku awor akí tin un bon bida di kachó serka un otro famia.
Entidat Públiko Boneiru, huntu ku e partnernan enbolbí, ke limitá molèster di kachó i no ta bai hasi esaki solamente pa medio di mantenshon di lei, pero netamente pa medio di prevenshon via dunamentu di informashon, oumento di konsientisashon i sosten konkreto di doñonan di kachó. Lo komuniká e akshonnan for di e agènda di ehekushon na un manera amplio.
