E kantidat di kachó na Boneiru a bira mas grandi i tin hopi insidente relashoná ku mordementu den notisia. Pa e motibu akí Entidat Públiko Boneiru ta kuminsá ku un kampaña di informashon i ta bai duna mas atenshon riba mantenshon di regla dor di doñonan di kachó.
Gobièrnu di Boneiru ke rekordá tur hende ku un doño di kachó ta responsabel pa komportashon di su kachó. Un doño di kachó mester evitá insidente ku mordementu i tene su bestianan di kas den kurá. Gobièrnu ta bai supervisá prevenshon i atendementu ku molèster di bestia i sufrimentu di bestia den un forma mas aktivo.
Siguridat riba kaya i den bario ta importante pa Gobièrnu, i pa e motibu akí a laga formulá un plan di akshon. A realisá e plan akí den kolaborashon ku diferente organisashon relashoná ku (kuido di) bestia. For di esaki a resultá ku e problemanan rondó di kachó, kachó ku ta kana lòs i kachó deskuidá, tin prioridat. For di e plan di akshon a sali rekomendashonnan konkreto ku Entidat Públiko Boneiru ta bai ehekutá e aña akí.
Na fin di luna di mart ta inisiá un kampaña di informashon pa mustra doñonan di kachó riba nan responsabilidat i e importansia pa kuida kachó. A wak tambe e leinan i reglanan aktual i e posibilidatnan pa mantenshon di lei. Aktualmente por mantené lei i pone e doñonan responsabel, a base di e ordenansa di kachó, Kódigo Penal BES, Plan di Maneho pa Naturalesa i Medio Ambiente Hulanda Karibense i Kódigo Sivil BES.
