GGD Bonaire / Salubridat Públiko ta pidi habitantenan i bishitantenan di Boneiru pa pone èkstra atenshon na nan salú durante periodonan ku ta kalor.
“Aunke henter aña ta kalor na Boneiru, nos ta mira spesialmente den lunanan ougùstùs te ku òktober temperatura mas haltu. Debí na kambio di klima, mundialmente tin mas periodo kalor i nan ta dura mas largu. Na Boneiru tambe esaki ta eksigí atenshon pa e konsekuensianan di kalor pa salú. Preparando nos mes bon pa e klima ku ta kambiando i kuidando otro, nos por limitá e konsekuensianan di kalor i mantené Boneiru salú,” segun GGD Bonaire / Salubridat Públiko.
Durante periodonan di kalor ta importante pa keda alerta, spesialmente pa hendenan vulnerabel rònt di bo. Ku medidanan simpel por prevení problemanan di salú pa motibu di kalor. Posibel problemanan di salú ta: kansansio, doló di kabes, biramentu di kabes, walmentu di stoma, kai flou òf bai leu.
Protehá bo mes i otro kontra kalor
GGD Bonaire / Salubridat Públiko ta duna e siguiente konsehonan:
· Protehá bo kurpa kontra solo. Bai mas tantu posibel den sombra i protehá bo mes kontra kontakto direkto ku solo. Evitá e momentunan mas kalor entre 11:00 i 15:00.
· Tira bon bista riba beibi i mucha chikitu. Nan por haña problema mas lihé pa motibu di kalor.
· Pone èkstra tinu na hende grandi i hendenan ku malesa króniko. Kontrolá regularmente kon ta bai ku nan, spesialmente ora nan ta biba nan so.
· Tene bo kurpa fresku. Buska manera pa refreská bo kurpa i keda mas tantu posibel na un lugá fresku.
· Bebe sufisiente awa i hasi esaki frekuentemente. No warda te ora bo tin set.
· Evitá di move den solo kayente. Plania esfuerso físiko mas tantu posibel na e momentunan fresku di dia.
Bo no ta sinti bo bon pa motibu di kalor? Bai un lugá fresku i bebe awa. E medidanan akí no ta yuda òf e síntomanan ta keda? Tuma kontakto ku bo dòkter di kas.
GGD Bonaire / Salubridat Públiko ta sigui traha na prevenshon i konsientisashon tokante salú relashoná ku kalor. Nos ta informá habitantenan tokante e riesgonan di e periodonan di kalor i ta traha pa komunidat ta mihó prepará kontra kalor.
Ku e aserkamentu akí, den kuadro di adaptashon na e klima ku ta kambiando, GGD Bonaire / Salubridat Públiko ke kontribuí na mas konsientisashon, mihó preparashon i prevenshon di problemanan di salú durante periodonan di kalor.
Pa mas informashon por tuma kontakto ku GGD Bonaire / Salubridat Públiko di Entidat Públiko Boneiru via publiekegezondheid@bonairegov.com òf +599 715 5324.
