Den e temporada tras di lomba, gezaghèber John Soliano a hasi algun bishita balioso na diferente organisashon sosial na Boneiru. Meta di e bishitanan akí tabata pa sera konosí mas di aserka i pa fortifiká su relashon ku Boneiru su sosiedat sivil. Durante e bishitanan el a haña un bista den e trabou importante ku e organisashonnan akí diariamente ta realisá pa bienestar di nos komunidat.
Na Mental Health Caribbean, gezaghèber a sera konosí ku e personal i el a bishitá entre otro e Departamento di Mucha i Hóben Hi-5 i Sentro Nos Perseveransia. El a haña splikashon tokante karakter i magnitut di e diferente gruponan di enfoke ku MHC ta sostené i tokante e desaroyonan riba tereno di kuido di salú mental den e añanan tras di lomba. Banda di esaki a papia ampliamente tokante sosten pa personana ku un adikshon i tokante e nesesidat pa sigui fortifiká kuido pa personanan ku ta haña nan mes enbolbí ku kehonan sikologiko. Gezaghèber a aksentuá importansia di kuido di salú mental aksesibel pa tur habitante.
Fundashon Ambulans Deseo Boneiru a presentá su mishon úniko na gezaghèber: pa realisá deseo di pashèntnan ínmobil òf personanan den nan último fase di bida, pa medio di un ambulans di deseo, spesialmente ekipá pa esaki. E fundashon a konta tokante e hopi donatùrnan ku a kontribuí pa realisá e bunita deseonan. Tambe e fundashon a mustra riba e disponibilidat grandi di boluntarionan pa yuda kumpli ku e eksperensianan spesial akí pa e pashèntnan. Durante e bishita impakto di e deseonan akí a bira evidente: e storianan di e pashèntnan pa kende a realisá nan deseo, tabata emoshonante i ta un indikashon di e nesesidat pa brinda mas atenshon, mas amor i mas kuido na e grupo di enfoke akí. Gezaghèber por a mira e ambulans di aserka tambe i el a haña splikashon tokante e ekipo i e posibilidatnan di e vehíkulo. Si bo konosé un hende ku tambe meresé pa realisá su deseo, e ora ei bo por nominá e persona akí pa un deseo grátis riba wèpsait di e fundashon: www.fadb.nu.
Na Krus Kòrá Boneiru gezaghèber a inspektá e ekiponan i fasilidatnan disponibel, ku ta varia di algun pòst móbil di EHBO te material médiko di emergensia, ekiponan di telekomunikashon i mas. E organisashon a splika kon nan ta hasi uso di nan boluntarionan den kaso di situashonnan di emergensia, ayudo humanitario i eventonan grandi. Banda di esaki nan a papia tokante nan proyektonan ku nan tin andando, kapasitashon pa empresa ku nan ta fasilitá i ròl di Krus Kòrá den un kadena humanitario mas amplio.
Durante un kòmbersashon ameno ku MiVaBo e organisashon akí a splika di nan trabou pa personanan ku limitashon i hende grandi. E organisashon a mustra tambe riba e retonan relashoná ku aksesibilidat na Boneiru. Durante e kòmbersashon nan a para ketu na e nesesidat pa mas konsientisashon i mihó fasilidat, manera sufisiente lugá pa stashoná outo, left ku ta funshoná i edifisio públiko aksesibel. Tambe MiVaBo a konta tokante nan aktividatnan, entre otro un programa di landamentu pa hende grandi, pero tambe e atenshon kresiente pa e asina yamá ‘mantelzorger’-nan ku hopi biaha ta eksperensiá preshon grandi.
Finalmente gezaghèber a bishitá Forsa Academy. Pa medio di uso di metodologia di Forsa na e departamento di SLP di SGB, ta ofresé guia i sosten èkstra na hòbennan ku problema di komportashon. Nan ta ofresé e hóbennan un programa ku ta yuda pa brinda mas struktura i perspektiva. Forsa a splika kon, huntu ku nan coachnan i empresanan lokal, nan ta desaroyá aktividatnan práktiko den entre otro sektor di hóreka, agrikultura i téknika. Durante e bishita a bira evidente kon e hóbennan via e aserkamentu akí ta edifiká sierto abilidatnan, ta kontinuá ku siñamentu i den pasonan chikitu ta traha riba regreso den enseñansa regular.
Gezaghèber ta ekspresá su profundo apresio pa tur boluntario, profeshonal, partner i donatùr ku ta komprometé nan mes pa e inisiativanan balioso akí. Banda di esaki e ta enkurashá nos habitantenan pa sigui traha komo boluntario pa e organisashonnan akí i pa otro organisashonnan. Kada forma di enbolbimentu ta kontribuí na koherensia sosial, forsa i resiliensia di nos komunidat. Danki na e kompromiso akí, huntu nos ta edifiká un komunidat atento i inklusivo.
