De Bilt – Gezaghèber Edison Rijna a hasi un bishita na Koninklijk Nederlands Meteorologisch Instituut - KNMI, e instituto meteorológiko di Hulanda. Na e ofisina prinsipal na De Bilt el a papia ku e mènedjer komersial stratégiko Jan Dekker i e mènedjer di e unidat spesialisá pa Servisio di Tempu i Klima Jan Rozema. For di 2016 Hulanda Karibense ta pertenesé na e área di trabou di KNMI. No solamente nan ta pèrkurá pa e anunsionan di tempu diario pa nos islanan, pero nan ta duna atvertensia tambe tokante kondishonnan spesial di tempu, entre otro na benefisio di nabegashon i piskadónan.
Den e rapòrt ‘Klimaatsignaal21’ ku nan a publiká aña pasá, pa promé biaha KNMI a dediká un kapítulo na Hulanda Karibense. Na e momentu akí e instituto ta elaborando diferente senario di klima pa nos islanan, teniendo kuenta ku subida di nivel di laman i e echo ku tormentanan den e parti sùit di Laman Karibe ta birando mas fuerte i e impakto di kalentamentu global riba por ehèmpel agrikultura i naturalesa.
Ekonomia di Boneiru ta sensibel pa kambio di klima. Hopi risòrt pa turista ta situá na kosta i nan ta vulnerabel pa subida di nivel di laman. E refnan di koral ku ta hasi nos isla asina atraktivo pa bishitantenan tambe ta bou di menasa di subida di nivel di laman den kombinashon ku e oséano ku ta birando mas zür i mas kayente. Mas aleu KNMI ta verwagt ménos yobida. Pa motibu ku e islanan ABC ta keda den e mesun área di klima, ta di importansia pa intensivá e kolaborashon manera interkambio di dato.
‘Komo isla chikitu nos no por para kambio di klima, pero nos por prepará nos mes sí riba impakto di esaki. Pa e motibu akí ta importante pa inventarisá e konsekuensianan di kambio di klima pa Boneiru riba término mediano i largu. Kaminda ta nesesario i posibel nos por tene kuenta ku esei den nos plannan, por ehèmpel na momentu di asigná sitionan di konstrukshon i kon nos ta bai sòru pa fangu i warda awa di yobe’, segun gezaghèber Rijna kende a tira un bista tambe den e impreshonante sala di pronóstiko di tempu di KNMI, kaminda nan ta sigui tur informashon tokante tempu na Boneiru den ‘real time’.
Na final di su bishita nan a ofresé gezaghèber un ehemplar di e ‘Bosatlas di tempu i klima’ nobo. E atlas ta mustra kon tempu a kambia durante e último dékadanan i kon e ta influensiá nos komunidat i aktividatnan diario. E edishon nobo ta kontené sentenares di
mapa, grafik i ‘infographics’. Algun página ta bai spesífikamente tokante tempu i klima na Hulanda Karibense.
