Diputado Hennyson Thielman a firma djaluna 22 di novèmber último, durante di su bishita di trabou na Hulanda, na nòmber di Entidat Públiko Boneiru un akuerdo di intenshon di koperashon ku e munisipio di Krimpen aan den IJssel.
E alkalde, señor Martijn Vroom, a firma na nòmber di e munisipio e akuerdo di intenshon, ku ta enserá ku e munisipio di Krimpen aan den IJssel ta dispuesto pa sostené Entidat Públiko Boneiru riba e area gubernamental ku traspaso di konosementu den e proseso pa establesé un Sentro di Servisio.
Manera ta konosí Entidat Públiko Boneiru ta trahando pa den kurso di otro aña kuminsá ofresé tur su servisionan bou di un dak dor di establesé un Sentro di Servisio. Den e kuadro aki e grupo di trabou di Digitalisashon di Entidat Públiko Boneiru a pidi e munisipio di Krimpen aan den IJssel sosten den realisashon di e plan aki. Ya durante e aña aki funshonarionan di e munisipio a sostené e grupo di trabou di Digitalisashon pa establesé prosesonan na un departamentu di Entidat Públiko Boneiru.
Ku firmamentu di e akuerdo di intenshon por sigui kana awor e kaminda pa formalisá e sosten di e munisipio di Krimpen aan den IJssel den realisashon di un Sentro di Servisio na Boneiru.
Ta e intenshon pa e munisipio di Krimpen aan den IJssel asistí Entidat Públiko Boneiru riba diferente tereno durante di e proseso pa establesé un Sentro di Servisio. Esaki dor di lanta un grupo di trabou Sentro di Servisio, dor di duna ekspertisio riba e area di lei i regla pa e Sentro di Servisio i tambe ekpertisio riba e area di maneho. Banda di esaki e munisipio lo duna asistensia tambe den e proseso di digitalisashon di e aparato públiko di Boneiru.
Ku e akuerdo di intenshon aki e munisipio di Krimpen aan den IJssel i Entidat Públiko Boneiru ke sondea tambe e posibilidatnan pa yega na un koperashon sostenibel di sosten gubernamental entre e Sentro di Servisio na Boneiru i esun na Krimpen aan den IJssel.
