Ayera e kurso Abilidat Sosial a tuma lugá na Fundashon FORMA. Esaki ta e di tres kurso grátis den un seri di kurso di hospitalidat ku Entidat Públiko Boneiru ta finansiá. Un inisiativa pa invertí den Boneiru su poblashon lokal i pa krea chèns pa funshonnan mihó pagá.
E treinen ‘abilidat sosial’ tabata na enkargo di Gianetta Ignecia, kende a siña e 13 kursistanan entusiasmá kon pa anda ku diferente situashon pa medio di un lès interaktivo. Un di e situashonnan tabata aktua ku enfoke riba solushon i komuniká ku personanan ku por ehèmpel ta hopi emoshoná òf rabiá. ‘Andamentu na un manera plasentero ku otro hende ta un aspekto importante. Ku e kurso akí e partisipantenan ta siña saka mas probecho for di komunikashon ku kliente. E meta ta pa engrandesé abilidatnan di e partisipantenan, di manera ku nan ta haña mas oportunidat den nan karera’, segun diputado Hennyson Thielman.
Den luna di mart Fundashon FORMA, den kolaborason ku Entidat Públiko Boneiru, TCB i BONHATA ta ofresé mas kurso grátis ainda, entre otro Hóreka (sirbi mesa, bartènder, asistente den kushina). Registrá bo mes òf bo empleadonan pa un di e kapasitashonnan akí òf pidi mas informashon via: cursussen@fundashonforma.com
