Riba djasabra 22 di yüni 2024 un evento spesial ta tuma lugá den Courtyard by Marriott Hotel, kaminda e strukturanan familiar afro-karibense i e konsepto ‘Yu sin doló’ – ser mayor di kriansa den un forma informal i tin ora formal – ta para sentral. E evento akí ta brinda konosementu profundo di un forma úniko di kuido i edukashon ku tin su raisnan profundo den e komunidat afro-karibense.
E anochi lo ta yená ku storia personal i konosementu profeshonal di un grupo diverso di orador. Nicole Terborg, un periodista hulandes prominente i yu muhé di e konosido aktris sürnam hulandes Jetty Mathurin, lo ta un di e wéspetnan prinsipal. Tempu ku e tabatin 13 aña Nicole su mayornan a mand’é for di un dòrp na Brabant pa un tanta na Amsterdam, di manera ku el a bira un ‘kweekje’ – e palabra sürnam pa un mucha ku un otro miembro di famia ta lanta, mihó konosí komo ‘Yu sin doló’. Nicole ta bai kompartí su búskeda personal pa haña sa e motibunan tras di e eskoho akí, manera por skucha tambe den su podcast ‘Kweekje, mi kwekipikin’.
Konteksto kultural
Banda di esaki Mimi Frans, prosedente for di Rincon, Boneiru, lo kompartí su eksperensia komo kuidadó di numeroso mucha ku no ta su yunan biológiko. Mimi ta brinda konosementu balioso den dinamismo di e forma spesial di kuido i edukashon akí den kultura boneriano. Shaedra Baromeo, ku tambe a lanta komo ‘Yu sin doló’ i despues a kria un yu ku no ta su yu biológiko, lo tira lus riba su perspektiva dòbel i e desafionan i enrikesementunan korespondiente. E sikiater pa mucha i hóben Eugenie Curiel ta bai kompartí su konosementu profeshonal tokante salú mental i edukashon den komunidat karibense, kaminda spesífikamente e lo dediká atenshon na e manera ku kontekstonan kultural ta influensiá desaroyo di mucha.
Relevansia i impakto
E evento ta kompletamente grátis i intenshoná pa oumentá konsiensia tokante kon ‘Yu sin doló’ ta hunga un ròl esensial den komunidatnan afro-karibense i kon e ta duna forma na bida di mucha i na famia. Pa medio di konta kuenta i skucha eksperensia, e enkuentro akí ta brinda un oportunidat úniko pa siña mas tokante e bèkgrountnan kultural riku i e impakto di sistemanan informal di ser mayor di kriansa. Jennifer Pocornie-Martis, organisadó di e evento, ta enfatisá: ‘E evento akí ta ofresé un plataforma pa kompartí eksperensia i konosementu ku hopi biaha ta keda sin haña sufisiente atenshon. Esaki ta un oportunidat pa selebrá i komprendé diversidat i komplehidat di strukturanan familiar afro-karibense.’
Informashon práktiko
E anochi ta tantu na papiamentu komo na hulandes, loke ta kontribuí na aksesibilidat pa un públiko amplio. Nos ta enkurashá e partisipantenan pa partisipá aktivamente na e diskushonnan i hasi pregunta na e oradornan, di manera ku ta surgi un eksperensia interaktivo i enrikesedor. Pa mas informashon tokante e evento i registrashon, bo por tuma kontakto via eventsbibliotekapubliko@bonairegov.com
Fecha: djasabra 22 di yüni 2024
Ora: 19:00 or te 21:30 or
Sitio: Courtyard by Marriott Hotel, Boneiru (sala di konferensia)
