Evaluashon di temporada di Karnaval 2025

Resientemente Sekshon di Kultura, Arte i Litertura (SKAL) di Gobièrnu a tuma nota di publikashon enkuanto di e temporada di Karnaval tras di lomba.

Komo departamentu enkargá ku ehekushon di maneho di Kultura riba nos isla, nos tambe ta tuma e reakshonnan akí na serio. No opstante, esaki no ta e úniko motibu pa kua akshonnan mester tuma lugá.

Manera ta usual, SKAL ta hasi un proseso di evaluashon di e temporada, e ehekushon i e impakto ku esaki tabatin i ainda tin riba nos komunidat. Spesialmente bou di karnavalístanan, músikonan i organisashon enkargá ku ehekushon di e evento kultural.

Kultura ta dinámiko i komo departamentu di kultura di Entidat Pùbliko Boneiru, nos ta apresiá kada unu ku ta dispuesto na pone nan skouder pa yuda karga nos kultura.  Pa medio di esaki SKAL ta hasi un yamada na un i tur ku kier aportá na e evaluashon akí. Esnan ku ta interesá ta invitá pa kompartí nan observashon, komentario i rekomendashon via imeil na skal@bonairegov.com, bou di e tópiko: "Evaluashon Karnaval 2025".

Kultura ta di nos tur!