Dia 31 di ougùstùs 2023 interesadonan eksterno a bini huntu un biaha mas durante e di tres seshon tokante mobilidat i alkansabilidat sostenibel ku direktorado di Planifikashon i Desaroyo a organisá na nòmber di entidat públiko Boneiru. E enkuentro akí ta marka un paso krusial den atendementu ku e desafionan di mobilidat na Boneiru. Kolaborashon, skucha otro i uni forsa a para sentral den e esfuerso eksitoso akí.
Entidat Públiko Boneiru ta komprendé ku e nesesidat pa transporte na Boneiru ta kresiendo i ta realisá su mes ku ta importante pa mantené nos isla bon alkansabel. E aspirashon pa yega na un sistema di transporte públiko strukturalmente organisá, huntu ku alternativanan sostenibel i vital manera kore baiskel i kana, entre otro ta para sentral den e vishon pa mobilidat di futuro i di Boneiru. Den esaki nos ta evaluá kada posibel solushon a base di seis kondishon básiko: Inklusivo (pa tur hende), alkansabel, seif, sostenibel, pagabel i inovativo.
Bou di guia di e Konsehero di Mobilidat i Komportashon Sostenibel, Marc van der Seijs (Adviesbureau &Morgen), durante e seshonnan a invitá mas ku 20 organisashon i interesado lokal, entre otro Fundashon Mariadal, Fundashon Cas Boneriano, Kámara di Komèrsio, BIA, WEB, Bonhata, MiVaBo, TCB, Stinapa, Rocargo i Maduro Bonaire pa traha huntu i kompartí idea. Komo preparashon riba e seshon kada un di nan a koperá tambe ku un entrevista tokante e tema.
E enkuentro akí a sòru pa un entusiasmo i kolaborashon grandi serka e partisipantenan, ku a haña inspirashon pa medio di ehèmpel di solushon pa mobilidat i alkansabilidat for di henter mundu, pero tambe for di den region. Kada partisipante a rekonosé tambe prinsipalmente e importansia di kolaborashon entre partidonan pa por logra den e propósito i vishon akí. Pa medio di traha konhuntamente riba e tareanan, ideanan balioso i aplikabel a bini dilanti.
‘Entidat públiko Boneiru ta enfatisá ku sosten fuerte i integral for di tur sektor ta krusial pa éksito di e plan di mobilidat’, segun diputado Thielman. ‘Nos ta agradesido pa e dedikashon di tur e partisipantenan na e seshon eksitoso akí. Kolaborashon i un vishon konhunto ta esensial pa mehorá mobilidat na Boneiru. Gobièrnu lo sigui traha riba e metanan akí, i nos ta apresiá kontribushon di tur hende enormemente.’
