Tur aña 12 ougùstùs, mundialmente ta selebrá Dia Internashonal di Hubentut. Entidat Públiko Boneiru (EPB) ta rekonosé e balor grandi di nos hóbennan i ta felisitá nan ku e dia spesial akí.
E aña akí Nashon Uní a skohe e tema ‘Solidaridat Intergenerashonal’ (solidaridat entre e diferente generashonnan). Aki énfasis ta riba trese huntu e diferente generashonnan dentro di komunidat, manera inkluí den e asina yamá Sustainable Development Goals (SDG's). Diputado Nina den Heyer, enkargá ku e kartera di Komunidat i Kuido: “Mi ta di opinion ku nos mester hasi uso di e potensial kompleto di tur generashon. Solidaridat entre generashon ta esensial pa un desaroyo duradero di nos isla i habitantenan, grandi i chikitu. Tur partido mester traha huntu pa promové relashon eksitoso i balioso entre generashon i sigurá ku ningun hende no ta keda tras.”
Balioso
Banda di esei, Gobièrnu di Boneiru ta traha kontinuamente na proyektonan konkreto pa mehorá posishon di nos hóbennan i protehá nan derechonan. Por ehèmpel a traha na subi kalidat di akohida pa mucha i hasi esaki pagabel, pero tambe na konsientisashon di hóbennan relashoná ku un estilo di bida salú, desaroyo di diferente aktividat i na mehorashon di e servisio na mayornan ku mester di sosten den edukashon di nan yunan. Den e periodo ku ta bini, ta dediká tambe mas atenshon na edukashon seksual. EPB ta enfatisá finalmente ku ta importante pa tur hende ku tin un mucha òf hóben den nan bida, pa para ketu na e ròl balioso ku nan tin den bida di e hóben. “Laga nos ta un modelo pa nos hóbennan i di e manera ei krea lidernan aun mas fuerte pa futuro”, e diputado ta bisa.
