Empleadonan di Entidat Públiko Boneiru i koleganan di Kámara di Komèrsio i Servisio di Imigrashon i Naturalisashon a sigui un treinen tokante ‘biahe di kliente’ (customer journey). E treinen tabata na enkargo di Ministerio di Asuntunan Interno i Relashonnan den Reino (BZK).
Durante e treinen e partisipantenan a siña kiko ta un ‘biahe di kliente’ i kon habitantenan ta eksperensiá servisio. Despues nan a traha den grupo riba un ehersisio. Paso pa paso nan a sigui ehèmpel di un habitante ku ta hasi uso di servisio di Entidat Públiko Boneiru. Den esaki nan a opservá kua ta e emoshonnan ku un habitante ta sinti i na unda problema ta surgi.
E método ta mustra kiko ta loke berdaderamente habitantenan tin mester di dje. E ta yuda tambe pa deskubrí puntonan di mehorashon ku ta direktamente usabel. Den esaki no ta trata solamente di regla i proseso, sino tambe di eksperensia di e habitante.
Siña i mehorá huntu
E treinen a sòru pa hopi konosementu. E partisipantenan a mira kon importante ta pa no solamente opservá prosesonan for di perspektiva di e organisashon, sino netamente for di perspektiva di e habitante. Na final nan a haña un sertifikado komo prueba di partisipashon.
Pasonan di kontinuashon
Den e periodo binidero e partisipantenan ta traha huntu ku un coach riba mas ‘biahe di kliente’. Esaki ta sosodé konforme e prinsipio di: demostrá – hasié huntu – hasié bo mes. Promé bou di guia, despues kada biaha den un forma mas independiente. Asina nan ta konbertí konosementu for di e kapasitashon den mehorashon konkreto.
Di e manera akí, paso pa paso Entidat Públiko Boneiru ta edifiká servisio ku ta konektá mas mihó ku deseonan i espektativanan di habitantenan di Boneiru.
