Entidat Públiko Boneiru ta kontradesí informe inkorekto tokante tereno i proseso di emishon

E siman akí a sali un artíkulo den vários medio di komunikashon i medio sosial, den kua nan ta hasi alegashonnan inkorekto tokante propiedat i uso di e tereno rònt di e Magasina di Rei na Amboina. Entidat Públiko Boneiru ta duna balor na transparensia i pa e motibu akí ke trese e echonan korekto bou di atenshon.

Propiedat di e tereno

Den e artíkulo nan ta alegá ku e tereno en kestion for di aña 1986 ta riba nòmber di Fundashon Adonai. Esaki no ta korekto. Na luna di yanüari 2015 a informá Fundashon Adonai por eskrito ku ta anulá hür di e tereno ku efekto inmediato. E tempu ei no a hasi opheshon kontra e desishon akí. For di e tempu ei a emití i akordá vários konseho interno relashoná ku emishon di e parsela. Relashoná ku esaki na aña 2022 Entidat Públiko Boneiru a otorgá un otro parsela komo kompensashon pa anulashon di e tereno en kestion.

Proseso públiko i transparente

Banda di esaki e artíkulo ta kontené e alegashon ku Entidat Públiko Boneiru a tene e proseso rònt di emishon di e tereno sekreto. Esaki tampoko no ta korekto. Dia 14 di novèmber 2024 Entidat Públiko Boneiru a anunsiá públikamente ku tin intenshon pa emití e tereno na benefisio di e proyekto ‘Nos Bario’. Un proyekto ku ta aportá na un impulso pa kuido di hende grandi i konservashon di patrimonio na Boneiru. A ehekutá esaki konforme e eksigensianan di e aresto Didam, kaminda tur interesado a haña oportunidat pa dentro di 20 dia entamá un kaso sumario. Sinembargo no a entregá ningun opheshon kontra e inisiativa akí. A publiká e anunsio akí dia 15 di novèmber 2024 den vários medio di komunikashon i tambe riba wèpsait di Live99FM i Bonaire.nu.

Kuadronan legal i aktuashon konforme lei

E tereno tokante kua a publiká, ta propiedat di Entidat Públiko Boneiru. Entidat Públiko Boneiru no a hasi ningun akto kontra lei i na un manera korekto i transparente a pasa den e prosedura, ku vários anunsio públiko. Tantu e tereno komo e edifisio, ku aktualmente nan ta hasi uso ilegal di nan, ta pertenesé na Entidat Públiko Boneiru.

Entidat Públiko Boneiru ta enfatisá ku den pasado tabatin vários kòmbersashon, den kua a indiká bon kla ku mester bandoná tantu e tereno komo e Magasina di Rei. Sinembargo te ku awe ainda nan ta hasi uso ilegal di esakinan.

Akusashonnan inkorekto

Finalmente Entidat Públiko Boneiru ta lamentá ku den e artíkulo tin kestion di intenshonalmente papia malu di un kolega pa medio di akusashonnan infundá. E tipo di ekspreshonnan ei por tin konsekuensia personal grandi i Entidat Públiko Boneiru ta konsiderá esakinan komo inapropiá.

Entidat Públiko Boneiru ta sigui komprometé su mes pa un komunikashon transparente i honesto i lo sigui kumpli ku proseduranan i legislashon vigente.