Relashoná ku diskushonnan resien den nos komunidat, Entidat Públiko Boneiru ta duna splikashon adishonal di e sistema di traha rònt di temporalmente depositá i rekohé sushi di vegetashon di parti di e kapplugnan. A surgi bruamentu tokante e diferensia entre sushi ku hende a dùmp den forma ilegal i sushi di vegetashon ku ta parti di e mantenshon regular. Ku e mensahe akí Entidat Públiko Boneiru ke klarifiká kon e proseso ta funshoná i dikon tin ora e sushi di vegetashon ta keda algun dia na un sitio. Segun un sistema fiho di traha nan ta depositá e sushi di vegetashon akí i seguidamente nan ta rekohé i transportá esaki.
Kon e proseso akí ta funshoná den práktika?
1. E kapplugnan ku ta traha ku mantenshon di vegetashon, hopi biaha ta topa ku kantidatnan grandi di sushi di vegetashon. Pa keda traha na un manera efisiente, no ta práktiko pa kada biaha transportá kantidatnan chikitu separadamente.
2. Den e tipo di kasonan akí e kapplugnan ta tuma kontakto ku Entidat Públiko Boneiru i ta pidi pèrmit pa depositá e sushi di vegetashon temporalmente riba un pida tereno indiká di gobièrnu.
3. Entidat Públiko Boneiru ta evaluá e sitio. Ta wak si e sitio ta seif, aksesibel i adekuá. Ta te ora ku esaki ta e kaso, Entidat Públiko Boneiru ta duna pèrmit pa temporalmente usa e sitio komo lugá pa depositá e sushi di vegetashon.
4. Dentro di e término palabrá nan ta rekohé e sushi di vegetashon, di manera ku e kapplug por kontinuá ku su trabounan na un manera efisiente, sin ku nan tin ku keda kore bai bin kontinuamente. Seguidamente ku trùknan grandi nan ta transportá e sushi di vegetashon ku a akumulá hiba lèntfel, i despues ta reanudá e trabounan di mantenshon.
Entidat Públiko Boneiru ta konta ku koperashon di habitantenan i ta enfatisá ku un bon komprenshon di e sistema di traha akí ta kontribuí na un Boneiru limpi i ordená.
