Pa keda inovativo i sigui mehorá nos prosesonan, durante e simannan tras di lomba a instalá kiosko ‘self service’ i ‘smart e-gates’ (porta elektróniko inteligente) na Aeropuerto Flamingo. Ta usa e aparatonan moderno akí pa kobra impuesto di turista i pa kontròl di QR-code.
E aparatonan nobo akí ta sòru pa un eksperensia mas rápido i mas agradabel pa nos bishitantenan. Banda di esaki nan ta redusí e chèns pa froude i eror humano. E tim di aeropuerto ta keda presente pa na un manera amabel yama e pasaheronan bon biní i pa yuda nan ora nan tin pregunta òf ora nan mester hasi deklarashon ònlain.
E pasaheronan ku tin un QR-code internashonal di $75 pagá, na un manera simpel via e ‘smart e-gates’ por skèn nan QR-code i haña akseso rápidamente. E bishitantenan ku ya kaba a hasi nan deklarashon ònlain, pero ku ainda no por a hasi e pago, por ehèmpel pa motibu ku nan no tin un iDEAL card òf creditcard, por akudí na e kioskonan ‘self service’.
Pa e bishitantenan ku tin un tarifa di eksepshon di $10 òf un eksonerashon, nada no ta kambia ainda. Te ainda nan ta haña asistensia personal i nan ta mustra e empleado públiko ku ta kobra e impuesto nan dokumentunan di prueba ku ta pertenesé na e tarifa di eksepshon.
Diputado Weber a tuma e aparatonan nobo ofisialmente den uso. Tokante esaki el a bisa lo siguiente: ‘Ku e modernisashon akí nos ta pone un paso importante den direkshon di kobransa inovativo i efisiente di impuesto. Nos ta sòru pa ménos eror humano i nos ta ofresé nos bishitantenan un eksperensia úniko i agradabel na nan yegada na Aeropuerto Flamingo i na Boneiru.’
