Entidat públiko Boneiru i Cargill Salt Bonaire B.V. (Cargill) a firma un akuerdo di intenshon (Letter of Intent). Ku esaki a duna inisio na negosiashon pa prolongashon di e akuerdonan di èrfpagt pa e ubikashonnan empresarial na Boneiru. Aktualmente Cargill ta den poseshon di terenonan di èrfpagt na Boneiru, otorgá na aña 1964 pa un periodo di sesenta (60) aña, ku ta terminá dia 24 di mei 2024. Entidat públiko Boneiru ta konsiderá Cargill komo un partner stratégiko i ke salbaguardiá kontinuidat di produkshon di salu na Boneiru.
Aspirashon di tantu Entidat públiko Boneiru komo Cargill ta pa prolongá e akuerdonan di èrfpagt i konsolidá un ‘partnership’ duradero ku nos isla. Cargill Salt Bonaire ta un parti krusial di e konsorsio mundial agro-industrial Cargill: un di e kuater empresanan di mas grandi na mundu den komèrsio agríkola. Ta eksportá e salu ku Cargill ta produsí na Boneiru pa 8 diferente pais i e ta di importansia esensial pa uso industrial.
Keda sin prolongá e kondishonnan aktual di èrfpagt lo a kondusí na un menasa di e kontinuidat empresarial, insiguridat riba merkado laboral i pèrdida di entrada pa e suministradónan na Boneiru. Un situashon kaminda no por kontinuá ku uso di e parselanan tambe lo a nifiká un posibel salida di e industria di salu for di Boneiru. E Letter of Intent ku nan a firma ta konfirmá e intenshon di ámbos partido pa negoshá tokante prolongashon di e periodo di èrfpagt.
E akuerdo di intenshon akí ta prolongá e akuerdonan aktual di èrfpagt ku en todo kaso un (1) aña te ku 24 di mei 2025 i te na momentu ku a logra un akuerdo tokante kondishonnan nobo pa èrfpagt i un akuerdo di kolaborashon. Ku esaki Kolegio Ehekutivo ta salbaguardiá kontinuidat di produkshon di salu na Boneiru, mantenshon di empleo i e kontribushon sosial ekonómiko di Cargill na nos isla.
