Pa medio di un ordenansa Entidat Públiko Boneiru ta disidí pa eliminá uso di plèstik di un solo uso. Esaki komo resultado di e moshon pa prohibí uso di plèstik desechabel ku Konseho Insular a aseptá dia 30 di òktober 2018. E meta ta pa redusí uso di plèstik desechabel pa medio di un prohibishon di un kantidat di produkto ku ta mas tantu usá, na benefisio di nos medio ambiente, salú di nos komunidat i un di e entradanan di mas grandi di Boneiru: turismo.
Representante di Ministerio di Infrastruktura i Maneho di Awa, señora S. van Veldhoven-van der Meer i diputado señor P.J. Kroon, komo representante di Entidat Públiko Boneiru, a firma un deklarashon di intenshon komo promé paso pa ehekutá e moshon di Konseho Insular. Un di e konsiderashonnan mará na e deklarashon di intenshon akí tabata e “Europese richtlijn 2019/904” nobo, ku ta trata minimalisashon di e efektonan di produktonan di plèstik di un solo uso. E moshon di Konseho Insular i e deklarashon di intenshon i e guia di plèstik di un solo uso, ta un base importante pa e Plan di Akshon pa prohibí produktonan di plèstik di un solo uso na Boneiru.
Ku e mira akí komo punto di salida dia 29 di mart último pa medio di un ordenansa Kolegio Ehekutivo a disidí pa bai di akuerdo ku e proposishon. Kolegio Ehekutivo ta demostrá ku e tambe ta para tras di e rason general: plèstik di un solo uso ku ta tirá tur kaminda ta un problema mundial i tambe pa Boneiru. Na Boneiru nan ta importá un gran kantidat di plèstik di un solo uso ku despues di uso ta resultá riba kaya i den nos awanan. Finalmente e ta bira un menasa pa nos medioambiente i e koralnan rònt di nos isla ku ta konosí pa su bunitesa i ku ta forma parti esensial di e ekonomia lokal. Produktonan desechabel ta un desperdisio di material i e ta kosta hopi sèn pa prosesá i deshasí di nan. Laman i awanan kontaminá ta malu pa peska i turismo. Alabes na Boneiru no por prosesá produktonan di plèstik di un solo uso i banda di esei na Boneiru no tin un merkado pa resiklá esakinan.
E ordenansa akí ta forma parti di e programa di gobernashon i duna espasio pa na un forma ordená deshasí di produktonan di plèstik di un solo uso. Kolegio Ehekutivo a skohe pa regla e materia aki den e ordenansa di produktonan desechabel, pa asina haña un mihó konekshon i pa asina implementá e prohibishon di produkto di plèstik di un solo uso mas lihé posibel. Banda di esei a hasi uso di e oportunidat pa aklará un par di provishon den e ordenansa di produktonan di tira afó, ku e mira riba un mihó mantenshon di prohibishon pa laga i tira sushi unda ku ta.
Kolegio Ehekutivo ta konvensí i alabes tin konfiansa ku entrega di e proposishon menshoná ta pone un paso importante den drechamentu di un ambiente di biba salu pa tur habitante i fortalesé un imágen duradero i ku esei tambe e ekonomia di nos isla.
