Riba enkargo di Entidat Públiko Boneiru (EPB), Banko Mundial ta kuminsá ku un enkuesta ku e meta pa haña bista kua ta e prioridat- i sintimentunan di habitantenan relashoná ku desaroyo urbano i turístiko. Lo prosesá e enkuesta den un rapòrt mas amplio ku lo komplementá ademas ku entrevista ku eksperto i estudionan tékniko ku a hasi anteriormente. Den e rapòrt lo tin evaluashon di senarionan di kresementu potensial i e lo sostené Kolegio Ehekutivo den hasimentu di eskoho stratégiko pa loke ta trata desaroyo duradero.
Gobièrnu di Boneiru a aserká Banko Mundial pa sosten tékniko ku trahamentu di un rapòrt tokante desaroyo duradero. Intenshon di e enkuesta ta pa e fungi komo e fuente prinsipal pa e rapòrt i lo dirigí su mes riba e impakto ku kresementu urbano i turístiko tabatin riba kalidat di bida di habitantenan i riba kon habitantenan ke mira nan isla sigui desaroyá.
Di 2 di ougùstùs te ku 15 di ougùstùs 2022, ta tene e enkuesta na diferente sitio na Boneiru bou di habitantenan di Boneiru. E enkuestanan ta tuma lugá tantu personalmente komo online i lo por yena nan tambe riba e wèpsait di Entidat Públiko Boneiru, kaminda esei lo ta posibel te 29 di ougùstùs. Lo trata tur kontesta riba e enkuesta estriktamente konfidensial. Lo presentá e resultadonan general durante seshonnan di informashon pa habitantenan di Boneiru riba kua nan por duna input adishonal. Despues ta publiká nan den un rapòrt final i lo pone esaki riba e wèpsait di Entidat Públiko Boneiru. Resultadonan di e enkuesta lo ta base pa e strategia pa mobilisashon di medionan institushonal, finansiero i tékniko ku ta nesesario pa kresementu di Boneiru.
“Ta di importansia grandi ku Boneiru ta desaroyá su mes di un manera duradero i responsabel. Nos ta na un punto krusial i a base di bon informashon, nos mester tuma desishon bon pensá pa futuro di nos isla. Pa por tuma e desishonnan akí, ta importante pa disponé di dato i konosemente korekto. P’esei nos ta hopi kontentu ku Banko Mundial tabata dispuesto pa hasi e investigashon akí i nos ta ansioso pa mira e resultadonan”, segun Hennyson Thielman, diputado pa Desaroyo Ekonómiko, Turismo i Finansa den Kolegio Ehekutivo di Boneiru.
James Kroon, diputado pa Infrastruktura i Medio Ambiente ta sigui bisa: “Nos ta mira nos isla krese i nos sa ku ta importante pa hasi eskoho konsiente pa futuro. E investigashon akí ta bai yuda nos ku esei. Mi ta hopi kontentu ku Banko Mundial no ta bai dirigí su mes solamente riba turistanan ku ta bin Boneiru, sino tambe riba habitante i e impakto ku kresementu tin riba nan”.
Technical Assistance Program for Disaster Risk Financing and Insurance in Caribbean Overseas Countries and Territories (OCTs) (Programa pa asistensia tékniko pa loke ta trata finansiamentu i seguro di riesgonan di kalamidat na paisnan karibense i Teritorionan Ultramar (LGO)) ku Union Oropeo ta finansiá, ta paga pa gastunan di e programa. Global Facility for Disaster Reduction and Recovery (GFDRR) (Institushon mundial pa redukshon di riesgo di kalamidat i reparashon) ta manehá e programa. GFDRR ta forma parti di Resilience, Sustainable Energy and Marine Biodiversity Program (RESEMBID) (Programa pa resilensia, energia duradero i biodiversidat marino), ku LGO-nan den Karibe ta ehekutá.
Gobièrnu di Boneiru ta invitá tur habitante di Boneiru pa yena e enkuesta i asina laga nan bos konta den e proyekto importante akí. Pa akomodá e diversidat den komunidat boneriano, e enkuesta lo ta disponibel na kuater idioma: hulandes, papiamentu, spañó i ingles.
Kontakto pa medionan di komunikashon:
Entidat Públiko Boneiru
Departamentu di Komunikashon (communicatie@bonairegov.com)
