E enkuentro ta partí na dos: unu kaminda diferente organisashon manera skol, akohida pa mucha, representante di sektor privá ta invitá pa partisipá. Esaki ta tuma lugá di 14:00 – 17:00 or na Biblioteka Públiko, Kaya Gramèl z/n. E di dos parti, un enkuentro ku siudadano, ta tuma lugá di 18:00 – 20:00 or na Biblioteka Públiko.
Meta di e enkuentro ta pa Biblioteka Públiko inventarisá ki ta e deseonan ku tin serka e organisashonnan i serka siudadano. I pa biblioteka di su banda informá kiko e por nifiká pa e organisashonnan i pueblo. Den un fase mas lat, biblioteka ta evaluá tur loke a bin dilanti. Pa despues wak kon pa inkorporá esei den práktika. Ta pidi siudadano òf organisashon ku ke partisipá na e enkuentro, pa nan registrá via mail na nirvelli.gijsbertha@bonairegov.com.
Durante e enkuentro biblioteka ta presentá su agènda pa 2024 tambe. Ta trata un programa variá ku hopi atenshon pa por ehèmpel, kultura, aktividat pa mucha, hóben i adulto. Den e enkuentro lo para ketu tambe na e plan pa muda e aña aki. I e plan pa yega na konstrukshon di un biblioteka nobo den futuro. Un biblioteka ku ta pas mas ainda ku e ròl klave ku bibliotekanan tin den komunidat.
