Fondo Hulandes pa Literatura ta organisá 13 di aprel di 10:00 – 12:00 un enkuentro na Biblioteka Públiko Boneiru tokante un areglo di supsidio nobo pa obranan literario na e islanan den Karibe. Ku e supsidio ta duna atenshon spesial na oumento di e oferta di obra na papiamentu. E enkuentro ta spesialmente pa eskritor, intérprete, traduktor i organisashonnan ku proyekto literario. Personanan interesá por registrá na t.walta@letterenfonds.nl.
Den kurso di e aña akí ta bini fondo disponibel pa supsidiá trabou di eskritornan, traduktornan, intérpretenan, òf proyektonan literario na e islanan. Pa e fondo ta importante pa sa kon por sostené trabou di e grupo akí mas mihó posibel. P’esei Lucette Châtelain i Suzanne Meeuwissen di e fondo ta bishitá islanan BES i CAS di 7 te ku 14 di aprel 2024. Ku e areglo di supsidio nobo, Fondo Hulandes di Literatura ta amplia su tereno di trabou.
Romkje de Bildt, direktor Fondo Hulandes di Literatura, ta splika importansia di e areglo di supsidio nobo. “Kisas esaki ta un di e partinan mas importante di e periodo nobo di maneho ku ta kuminsá na prinsipio di otro aña. E maneho akí solamente por tin éksito si nos areglonan ta konektá ku nesesidatnan i deseonan di kreadónan i organisashonnan na e islanan den Karibe. P’esei nos ta spera tambe ku mas tantu hende posibel ke pensa ku nos.”
Jennifer Pocornie, hefe di Biblioteka Públiko Boneiru ta kontentu ku e areglo nobo. “Ta un oportunidat úniko pa eskritornan lokal i otronan partisipá na kòmbersashonnan tokante kontenido di e areglo di supsidio. Na yanüari di e aña akí, a rekonosé papiamentu ofisialmente den Manifesto Europeo pa idiomanan regional i idiomanan di gruponan minoritario. Mi ta kontentu ku e areglo nobo lo por kontribuí na mas obra na papiamentu,” segun Pocornie.
