Na Boneiru temporada di áwaseru ta dura di òktober te yanüari. Den temporada di áwaseru e chèns pa haña dengue, zika i chikungunya ta oumentá. Na aña 2024 i 2025 Boneiru tabatin dos brote di dengue. E tempu ei mas ku 900 hende a bira malu. For di sèptèmber último e kantidat di dengue ta abou atrobe.
Ta importante pa den temporada di áwaseru eliminá tur lugá di brui di sangura ku ta transmití e malesanan akí. E sangura ku ta plama e malesanan akí, e Aedes aegypti, ta pone su webunan den awa di yobida ku ta para ketu. E sangura akí ta prinsipalmente aktivo parti mainta òf atardi lat.
Kita tur opheto sin tapa ku awa di yobida aden for di den bo kurá
E sangura Aedes aegypti ta pone su webunan den opheto sin tapa ku awa di yobida aden, manera den tayer di outo, baki di plèstik, hèmber, bòter i skòter bou di baki di mata. Di tur e personanan ku e tim di kontroladó di GGD a bishitá, mitar di nan tabatin hèmber ku larva di e sangura Aedes aden. Den baki di awa i tayer di outo tambe regularmente nan a topa ku e larvanan di Aedes.
- Eliminá tur opheto den kurá ku awa di yobida por keda para aden òf hasi nan bashí tur dia.
- Tapa barí di awa i baki di awa bon ku un tapa, ku paña òf ku skrin di sangura.
- Kontrolá bo kurá minimalmente un biaha pa siman pa wak si tin posibel lugá di brui.
Protekshon kontra piká di sangura
- Usa un spray òf un zalf ku DEET pa kore ku sangura.
- Bisti paña ku ta tapa bo kurpa bon.
- Na kas usa skrin pa porta i bentana, òf drumi bou di un muskitero.
Chikungunya na Cuba i Barbados
Na aña 2015 pa último biaha Boneiru tabatin un brote di chikungunya. Na aña 2025 pa promé biaha despues di hopi tempu nan a mèldu kasonan di chikungunyu na Cuba i Barbados. Na Asia i Oropa tambe nan a méldu brote di chikungunya e aña akí. Pa e motibu akí GGD Boneiru ta èkstra alerta. GGD ta konsehá biaheronan ku ta bai kualke isla òf pais kaminda tin chikungunya, dengue òf zika, pa protehá nan mes èkstra bon kontra piká di sangura.
Mas tep i konseho
Pa konseho tokante tratamentu di renbak òf barí di awa, bo por yama GGD Boneiru na e number di telefòn 715 – 5324. Riba www.bonairegov.com/pa/sangura tin mas tep i e preguntanan frekuentemente hasí tokante dengue, zika i chikungunya.
