Dia 7 di sèptèmber Edsel Winklaar a kuminsá komo direktor interino di Planifikashon i Desaroyo (R&O) na entidat públiko Boneiru. Edsel Winklaar lo ehersé e funshon akí te na momentu ku nombra un direktor permanente. Entretantu entidat públiko Boneiru a kuminsá ku e prosedura pa reklutá kandidatonan adekuá.
E direktorado di Planifikashon i Desaroyo ta okupá su mes entre otro ku repartishon di tereno, emishon i kontròl di pèrmit di konstrukshon i konstrukshon di kaminda. E direktor di Planifikashon i Desaroyo ta desempeñá un ròl krusial na momentu di asesoramentu di Kolegio Ehekutivo.
