Den kuadro di e proyekto 'Embeyesé nos Malekon', direktorado di Planifikashon i Desaroyo ta hasi diferente trabou di mantenshon riba Malekon.
Den e promé kuartal di e aña aki, a fèrf e muraya na 'Chachacha Bich’ i e sitio di rekreo ku bista riba Waf Nello Craane i tambe e espasio públiko ku bista riba Waf Chicu Mercelina ku kolonan inspirá pa nos karkó. Alabes a pone banki na e sitionan aki. Mas aleu a hasi mantenshon na Plasa Machi Mimi, kaminda a usa e kolonan ku e tabata tin den pasado.
Den e di dos kuartal di e aña aki, a pone balustrada pa e trapi na Chachacha Bich. Aparte di esaki a planta vários palu endémiko, manera entre otro palu santu, kohara spañó, drùif di laman i mangel blanku. Parti di proyekto tambe a konsistí di un artista lokal ku a dibuhá e ‘slogan’ di Boneiru riba e muraya dilanti di Ofisina di Haf.
Mas despues, den e promé siman di yüli, a finalisá un otro fase di e proyekto kaminda a duna bida na e área di rekreo na altura di Kas di Regata pa medio di pone banki di betòn i palapa pa krea sombra.
Meta di e proyekto ‘Embeyesé nos Malekon’ ta pa hasi Malekon mas seif i mas bunita. Den e fasenan binidero ta bai atendé ku e bòrchinan di tráfiko, ta bai hasi mantenshon na e bakinan di mata i ta planta mata den e bakinan ku ta bashí. Pa sòru pa e matanan haña awa konstantemente ta pone un sistema di drep i pa konkluí e proyekto ta hasi mantenshon na e klenkunan.
Ku e inisiativa akí nos ta mehorá funshonalidat di nos Malekon pa usuarionan por disfrutá mas mihó ainda di e espasio akí. Danki pa boso koperashon miéntras entidat públiko Boneiru ta traha pa un mihó Malekon pa nos tur.
