Meta di e evento ta pa duna inisio na e periodo di San Juan i San Pedro, alabes for di algun dia promé hinka nos pueblo den e esfera di e dos fiestanan kultural kual nan respektivo fecha ta dia 24 i 29 di yüni.
É Chispa di Wan ku Pedu e aña aki ta konta ku animashon musikal di Foyan Boyz i Grupo Niki Mix. Mas ku klaro lo tin e tradishonal i demostrashon di e tan gustá bulamentu di kandela. Diputado enkargá ku kultura James Kroon lo deklará e periodo di San Juan ku San Pedro 2023 habri, esaki den forma simbóliko pegando e promé flambeu.
É Chispa di Wan ku Pedu 2023 ta tuma lugá djasabra 17 di yüni na e parke Lalan Clarenda na Nikiboko entre 7:00-or pa 10:00-or di anochi.
E aña aki SKAL ta sigui ku su inovashon relashoná ku selebrashon di Wan ku Pedu dor di entregá un fakel di kandela na dos persona ku ta ligá den e kanto i tokadó di San Juan i San Pedro den e bario di Nikiboko.
SKAL ta invitá henter pueblo di Bonaire na É Chispa di Wan ku Pedu, asina kalentá pa e selebrashonnan tradishonal mes.
Selebrashonnan tradishonal:
Segun tradishon den diferente bario aki na Boneiru, ta selebrá e fiestanan kultural San Juan i San Pedro riba dianan 24 i 29 di yüni, inisiando ya for di bispu di respektivo fecha.
Djabièrnè 23 di yüni tin selebrashon di San Juan den barionan Rincon, Nort Saliña, Antriol i Nikiboko ku Tera Cora.
Djárason 28 di yüni den mesun barionan ta tuma lugá e selebrashon di San Pedu.
SKAL ta spera ku e aña aki atrobe den tur bario e selebrashonnan di tantu San Juan komo San Pedro lo ta grandioso, demostrando asina ku nos pueblo sa kon pa mantené bibu su fiestanan kultural i folklóriko.
