E siman akí e trabounan pa hasi besindario di Parke Plasa Chiku Goeloe ku ta bon frekuentá, mas atraktivo i sigur, a kuminsá. Lo hasi diferente adaptashon riba tereno di infrastruktura i landscaping.
Kapa duru
Ta bai duna e lugánan di parker i e área rondó di e parke un kapa duru i ta pone un alsera elevá, kaminda ta tene kuenta ku personanan ku un desabilidat. Ta kita tur waya riba tera i pasa nan bou di tera. Ta bin lusnan di kaya nobo di LED ku ta efisiente den uso di koriente i ta kontribuí na hasi e besindario mas sigur. Ademas ta spar asina riba gastunan di maneho i mantenshon. Banda di esei ta pone un sistema di drenahe pa garantisá ku tin sufisiente desagwe.
Ambiente bèrdè
Un ambiente bèrdè tin hopi bentaha. Pa e motibu ei diputado Hennyson Thielman ta haña importante i ta enfoká pa tene kuenta ku esaki den proyektonan. E tin efekto positivo riba salú di hende, e ta kontribuí na kalidat di bida di e besindario, ta drecha medioambiente, ta eliminá polushon i ta pèrkurá pa èkstra freskura durante periodonan di kalor ekstremo.
Plasa Chiku Goeloe
Ta hasi uso di e parke Plasa Chiku Goeloe pa diferente aktividat di hóben i adulto. Tur aña ta tene selebrashon di Dia di Antriol na e sitio akí. Tambe ta duna semanalmente lès di karate einan, tin aparatonan di fitness ku tur hende por hasi uso di nan i tin un sala disponibel pa enkuentronan ofishal i festivo.
A traves di nos página di facebook i komunikado di prensa lo tene bo na altura di tur trabou di karetera i di proyektonan.
