Theodorus Aloysius Marie “Dick” van der Vaart a risibí kondekorashon Real for di mannan di Gezaghèber Edison Rijna.
Ta un muestra di gratitut pa su dedikashonnan.
Dòkter Dick manera kariñosamente nan ta yam’é, promé ku la baha ku penshun tabata direktor i dòkter di kas independiente na Centro Médico Central Bonaire, direktor di un sentro hiperbáriko, dòkter di buseo, dosente i músiko.
Dekorandùs a realisá un kamber di rekompreshon na Boneiru basá riba e kresementu di e indústria di buseo. Tambe e kamber aki por us’é pa diferente tratamentu. Ku realisashon di e sentro hiperbáriko aki dekorandùs por a yuda skapa hopi bida eksitosamente, skapa hopi persona di amputashonnan i tambe hasi di Boneiru un destino popular i ku seguridat pa e turismo buseador.
Mester bisa ta èksistí e opshon pa por skohe pa risibí un kondekorashon durante okashon general huntu ku otro dekorandùsnan ò por skohe pa un okashon partikular. Mirando e echo ku dekorandùs tabata teniendo un simposio tokante kamber di rekompreshon algun persona yegá na dòkter Dick van der Vaart a opta pa sorpres’é na e okashon ei.
Mirando tur e lokualnan dekorandùs a hasi su Mahestat Rei Willem Alexander a nombra dòkter Dick van der Vaart komo Öfficier in de Orde van Oranje Nassau”
Gezaghèber na e okashon aki a felisitá dekorandùs ku e bunita logro aki.
Sr. drs. Theodorus Aloysius Marie (Dick) van der Vaart, den e kaso akí, dekorandùs
Dekorandùs a pasa den un karera fantástiko den tur modestia; mas ku 35 aña dòkter di kas, direktor / doño di i trahando komo dòkter di kas independiente na Centro Medico Central Bonaire, direktor di un sentro hiperbáriko, dòkter di buseo, dosente i músiko. Semper kla pa yuda, nunka p’e no ta un problema pa duna kontesta, semper dunando ayudo rápido i adekuá na su propio manera amabel, desidido i plasentero.
Mirando e industria di buseo ku ta kresiendo i pa mehorá siguridat di esaki, na aña 1986 dekorandùs a realisá un kamber di rekompreshon na Boneiru. Siendo e inisiadó, fundadó i direktor di Foundation Recompression Chamber Bonaire, dekorandùs na un manera spesial a konektá kalidat di kuido di salú i promoshon di industria di turismo ku otro.
Den promé instante a hasi uso di un tanki hiperbáriko ku Marina Real a opsekiá, ku nan a pone den un espasio chikitu. Na aña 2006 a introdusí e kamber moderno akí ku ta keda usá pa otro tratamentunan tambe; dekorandùs a mira e posibilidat pa hasi uso di e kamber pa pashènt ku herida ku tin problema pa kura, manera pashènt diabétiko, den kaso di amputashon òf herida onkológiko ku no ta kura. Ku realisashon eksitoso di e kamber di rekompreshon dekorandùs por a salba hopi bida, eksitosamente evitá un kantidat innumerabel di amputashon i hasi di Boneiru un destinashon di buseo popular i seif.
Dekorandùs ta fultaim disponibel komo dòkter di buseo pa duna tratamentu na sambuyadónan òf pa duna konseho na su koleganan. Banda di esei e ta ofresé (re)kapasitashon riba tereno di medisina di buseo, e ta duna formashon na dòkternan, enfermera- i enfermeronan i e ta tene presentashon na kongresonan. E ta mantené kontakto estrecho ku Divers Alert Network USA, ku kua den sentido tékniko tambe e ta tene kalidat di e kamber di rekompreshon na nivel haltu. Te na Oropa i Merka dekorandùs su nòmber ta konektá na bon medisina i arte di medisina, ku un spesialisashon ekstraordinario komo dòkter di buseo i dòkter hiperbáriko.
Por kualifiká dekorandùs komo ‘un persona ku pa hopi tempu a hasi esfuerso na benefisio di komunidat i ku a stimulá otronan pa hasi esaki’.
Ku bista riba e total di su méritonan i mirando e karakter, durashon, prestigio internashonal, impakto i nifikashon di su aktividatnan, Su Mahestat Real Rei Willem Alexander ta nombra señor drs. Theodorus Aloysius Marie (Dick) van der Vaart komo Officier den Òrden di Oranje-Nassau.
