Na Boneiru resientemente nan a mèldu un oumento remarkabel di e kantidat di muska. Relashoná ku e notifikashonnan akí Direktorado di Supervishon i Mantenshon di lei a hasi un evaluashon rápido. E evaluashon akí a enfoká riba e sitionan for di kua a bini mas tantu notifikashon.
Investigashon na supermarket i minimarket
Na 6 supermarket i minimarket e direktorado a investigá si tabatin posibel fuentenan ku por a splika oumento di e kantidat di muska. For di e investigashon a resultá ku na e tiendanan akí no tabatin ningun kousa evidente ku por a splika e oumento di muska. Entre tantu e sitionan akí a tuma medida pa kombatí e muskanan.
Análisis di e Tim di Vector
E tim di Vector di departamento di Salubridat Públiko, ku ta enfoká riba monitoreo i kombatimentu di sangura, tambe a hasi un investigashon. Na e sitio di depositá shushi di Selibon a haña mas tantu muska ku normal. A palabra sierto medidanan ku Selibon pa redusí plamamentu di muska. Sinembargo, e hayasgonan akí no ta splika e oumento total di muska na nos isla.
Influensia di tempu
Banda di e sitionan i akshonnan menshoná akí riba, a resultá ku e situashon aktual di wer tambe ta hunga un ròl den kaso di oumento di e kantidat di muska.
Salubridat públiko i medidanan di prekoushon
Departamento di Salubridat Públiko ta enfatisá ku e oumento di muska no ta forma un riesgo grandi pa salubridat públiko, pero ta indiká sí ku ta importante pa tene kuenta ku e medidanan básiko di higiena (di kuminda), manera protekshon di kuminda kontra muska.
