Direktorado di Supervishon i Mantenshon di Lei di entidat públiko Boneiru a ranka sali ku un kapítulo nobo na momentu ku nan a tuma e edifisio nobo na Kaya Grandi 56-58 den uso.
E mudansa a bai huntu ku un presentashon renobá di e direktorado. E empleadonan a haña unifòrm nobo i e outonan di servisio tin ‘sticker’ nobo.
Na okashon di e logro akí vários miembro di Konseho Insular i diputado Abraham a hasi un bishita ofisial pa ekspresá nan sosten pa e trabou di direktorado di Supervishon i Mantenshon di Lei den nos komunidat. Pastor Mark Hooijschuur tabata presente pa bendishoná e edifisio, komo un inisio simbóliko di un futuro ku siguridat, integridat i kolaborashon.
‘Nos ta orguyoso ku awor akí nos ta trahando na un sitio sentral kaminda habitantenan por haña nos mas fásilmente,’ segun direktor Marlon Richardson. ‘Ku e presentashon nobo akí nos ta mustra ku nos ta kla pa hasi nos trabou mas mihó ainda pa siguridat i habitabilidat di Boneiru.’
For di djamars 4 di novèmber direktorado di Supervishon i Mantenshon di Lei ta reanudá su trabounan kompletamente for di e ubikashon nobo. Direktorado di Supervishon i Mantenshon di Lei ta sigui komprometé su mes na un manera inkansabel pa un Boneiru seif, habitabel i ordená, awor akí for di un sitio ku ta kla pa kresementu i mas profeshonalisashon.
