Direktorado di Supervishon i Mantenshon di Lei i MBO Boneiru ku orguyo ta anunsiá ku nan kolaborashon rònt di lugá di stazje a terminá eksitosamente. For di komienso di e trayekto, studiantenan di MBO Boneiru a haña oportunidat pa atkerí eksperensia balioso den mundu di supervishon i mantenshon di lei, entre otro duna sosten ora tin evento i supervishon na sitionan públiko.
E lugánan di stazje no solamente a brinda studiantenan un posibilidat pa pone nan konosementu teóriko den práktika, pero tambe pa desaroyá abilidatnan krusial riba tereno di siguridat públiko. Ku esaki e kolaborashon no solamente a kontribuí na kresementu profeshonal di e studiantenan, pero tambe na fortifikashon di siguridat i òrden na Boneiru.
Ku hopi satisfakshon señor Richardson, direktor di Direktorado di Supervishon i Mantenshon di Lei, ta wak bèk riba e trayekto: ‘E stazjenan a forma un brùg importante entre enseñansa i práktika. Nos ta orguyoso ku dedikashon i prestashon di e studiantenan i nos ta agradesido pa e aporte balioso ku nan a duna na nos trabou. E kolaborashon akí ta mustra kon importante ta pa enbolbí talento lokal aktivamente ku siguridat públiko.’
MBO Boneiru tambe ta pone énfasis riba importansia di e programa: ‘E kolaborashon akí ta brinda nos studiantenan un oportunidat úniko pa atkerí eksperensia den práktika, loke den un forma ekselente ta prepará nan pa un karera den sektor públiko. Nos ta spera un kontinuashon di e kolaborashon eksitoso akí.’
Mirando e resultado positivo, ámbos partido a ekspresá e intenshon pa den futuro ampliá e kolaborashon i ofresé mas studiante di MBO Boneiru un oportunidat pa kore stazje na Direktorado di Supervishon i Mantenshon di Lei.
