Den e periodo tras di lomba Direktorado di Supervishon i Mantenshon di Lei a ehekutá vários kontròl riba benta di vürwèrk den kuadro di kambio di aña. Nan ta ehekutá e kontròlnan akí pa salbaguardiá siguridat i pa supervisá kumplimentu ku legislashon i regulashon vigente.
Dia 23 i 24 di desèmber Direktorado di Supervishon i Mantenshon di Lei a tene kontròl preventivo na tur e 17 puntonan di benta indiká pa vürwèrk. Dia 26 di desèmber e bendedónan a buska nan vürwèrk. Dia 27 di desèmber e puntonan di benta a habri i e direktorado a kontinuá ku e kontròlnan regular.
For di e kontròlnan ta resultá ku te ku awor e puntonan di benta ta kumpli ku e eksigensianan imponé. E kontroladónan no a konstatá niun violashon di importansia. Direktorado di Supervishon i Mantenshon di Lei ta satisfecho ku e kumplimentu i ta spera ku esaki ta keda asina durante henter e temporada di benta.
Direktorado di Supervishon i Mantenshon di Lei ta keda aktivo i nan ta kontinuá te ku 31 di desèmber ku e kontròlnan, pa sigui supervisá kumplimentu ku e reglanan i pa sòru ku tur kos relashoná ku vürwèrk ta kana na un manera seif. Intenshon di e kontròlnan ta pa salbaguardiá siguridat di e bendedónan, e kumpradónan i e hendenan ku ta biba den bisindario di e puntonan di benta.
Reglanan di siguridat na momentu di kumpra i tira vürwèrk
- No ta pèrmití pa mucha bou di 18 aña kumpra vürwèrk.
- Semper lesa e instrukshonnan di uso promé ku tira vürwèrk.
- Ta pèrmití mucha i menornan di edat tira vürwèrk solamente bou di supervishon di un hende grandi.
- No ta pèrmití pa huma na e puntonan di benta di vürwèrk.
- Sea konsiente di e peligernan relashoná ku tiramentu di vürwèrk.
- Semper tuma medida di prekoushon ora di tira vürwèrk.
Direktorado di Supervishon i Mantenshon di Lei ta hasi un yamada riba tur hende pa tene nan mes na tur regla, di manera ku e kambio di aña por kana na un manera seif i responsabel.
