Boneiru mester tin e disposishon di mas ku un laboratorio. Asina Kolegio Ehekutivo a bisa den un kòmbersashon ku nan tabatin ku e sekretario di estado di Salubridat Públiko, Bienestar i Deporte, Maarten van Ooijen, ku aktualmente ta na Boneiru pa un bishita di trabou.
Na e manera aki Kolegio Ehekutivo ta boga pa derecho di eksistensia di BonLab, despues ku Ofisina di Seguro di Kuido (ZVK) a anunsia e terminashon di nan kontrato ku BonLab entrante 1 di yanüari 2023. E diputadonan ta di opinion ku nos isla no mester dependé di solamente un laboratorio. Esaki lo pone Boneiru den un posishon hopi vulnerabel, sigur ora ku tin brote di un pandemia atrobe. Lo kontinuá ku e kòmbersashonnan ku i tokante BonLab.
Tambe diputado Nina den Heyer a mustra e sekretario di estado riba importansia di un aserkamentu den kuido ku ta tene kuenta ku efektonan di nos kultura i kaminda famia ta para sentral. “Esaki no mester ekspresá su mes solamente den e manera di anda ku hende, pero tambe den e metodologianan di dunamentu di ayudo ku ta ser usá”, segun Den Heyer. Mas aleu a papia tambe tokante si ta faktibel pa Boneiru tin su propio banko di sanger.
