Awe riba dia di prensa diputado di Komunikashon na nòmber di kolegio ehekutivo a ofresé un representante di kada medio di komunikashon un desayuno gradisiendo nan pa nan trabou di informá nos komunidat.
Gezaghebber na e okashon aki tambe a hiba palabra i a rekonosé e trabou importante ku prensa ta hasi pa nos. Ku prensa ta di kuater pilá den nos demokrasia i ta spera ku prensa lo sigui tene nos skèrpi i informá nos komunidat abase di echonan i tambe kosnan verídiko. Tambe gezaghebber a asentuá ku prensa tin un trabou hopi fuerte den nos komunidat i responsabilidat grandi. Na final gezaghebber ta spera ku e dia aki por ta unu di reflekshon pa prensa por sigui ehersé e trabou aki di un manera bon I pa informá e pueblo bon.
Banda di gezaghebber diputado di Komunikashon sr. Hennyson Thielman a trese dilanti ku prensa tin un ròl importante den nos komunidat . Komo prensa nan tin e tarea di investigá loke ta pasa den nos komunidat , no solamente di Gobièrnu pero tambe den sektor privá.Diputado a para un ratu ketu na un miembro di prensa internashonal Jamal Khashoggi kon ela bai investigá i bai dip sierto kamindanan ku tabata bon pa e komunidat, pero na mes momentu tabatin forsanan ku a bringa kontra dje te ku nan a asesin’é. Esaki ta muestra di e ròl importante ku prensa tin den nos komunidat di buska informashonnan usando sierto kosnan pa sierto kamindanan por sali na kla, prensa tin un ròl pa saka esakinan dilanti. Boso ta haña forsanan ku ta bringa esaki i stroba boso pa saka sierto informashonnan dilanti pero boso mester sigui hasi esaki.
Na final diputado a trese dilanti ku na nòmber di Kolegio Ehekutivo nan ta gradesido pa e ròl ku prensa tin i ku defakto ta un responsabilidat di komuniká ámbos banda I wak e informashon di un manera ophetivo I sòru pa e bèrdat sali na kla mirando ku un medaya tin tur dos banda.
Diputado a gradisí prensa pa nan trabou inkansabel I deseá nan un felis dia di prensa.
