Riba djabièrnè 8 di sèptèmber na direktorado di Planifikashon i Desaroyo, sr Hennyson Thielman, diputado enkargá ku naturalesa, tabatin un enkuentro ku representantenan di organisashonnan prominente di preservashon i rekuperashon di naturalesa na Boneiru. Un kunukero lokal ku un di e parselanan mas grandi di permakultura na nos isla tambe tabata presente. E enkuentro akí a pone énfasis riba e dedikashon kontinuo di Entidat Públiko Boneiru na un aserkamentu integrá di protekshon di medio ambiente na Boneiru.
E meta prinsipal di e enkuentro tabata pa laga e organisashonnan di naturalesa sera konosí ku e diputado i e empleadonan públiko enbolbí. Kada organisashon a presentá su trabou i prioridatnan, loke a kondusí na un interkambio fruktífero di idea i strategia. Esaki ta marka inisio di un kolaborashon prometedor. Diputado Thielman a enfatisá: ‘Rekuperashon efektivo di naturalesa na Boneiru ta eksigí kolaborashon, esfuersonan kordiná i un vishon riba término largu. Miéntras nos ta progresá, ta importante pa haña ekilibrio entre e diferente sektornan di nos komunidat i e diferente interesnan, i pa kontinuamente aspirá pa yega na solushonnan ku ta favorabel pa tur hende.’
Diputado Thielman a anunsiá tambe e plannan pa un kumbre di naturalesa, i dentro di poko ta sigui mas detaye tokante esaki. E kumbre di naturalesa akí ta habrí pa aporte, no solamente di organisashonnan di preservashon di naturalesa, pero tambe di sektornan manera agrikultura, peska i turismo. Optené konosementu durante e kumbre di naturalesa akí lo hunga un ròl krusial den dunamentu di forma na e strategia di naturalesa i desaroyo di Boneiru, kaminda ta sigui edifiká riba maneho eksistente.
E organisashonnan ku a partisipá na e enkuentro dia 8 di sèptèmber ta enserá vários ophetivo di protekshon di naturalesa, manera preservashon di e palma Sabal endémiko di Boneiru di parti di Bon Bèrdè, rekuperashon inovativo di koral di parti di Reef Renewal Foundation, i otro organisashonnan di naturalesa manera STINAPA, Caribbean Speleological Society, Echo Foundation, Sea Turtle Conservation Bonaire i e departamento hulandes karibense di WWF.
Miéntras Boneiru ta brasa práktikanan sostenibel, e inisiativanan akí ta pone énfasis riba embolbimentu di nos komunidat ku protekshon i fortifikashon di e biodiversidat diverso di nos isla. Esaki na su turno lo mester sostené e medionan di eksistensia, siguridat di kuminda i resiliensia kontra kambio di klima.
